साउन महिनामा नेपालबाट ३२ करोड बढीको अलैंची निर्यात

चालु आर्थिक वर्षको पहिलो महिना साउनमा नेपालबाट ३२ करोड १७ लाख ६१ हजार रुपैयाँको अलैंची निर्यात भएको छ ।

मूल्यका आधारमा गत आर्थिक वर्षको साउनको तुलनामा चालु आर्थिक वर्षको साउनमा ९९ दशमलव ५४ प्रतिशतले अलैंची निर्यात बढेको भन्सार विभागले जनाएको छ । चालु आर्थिक वर्षको साउनमा भारतमा मात्रै अलैंची निर्यात भएको छ । गत आर्थिक वर्षको साउनमा १६ करोड १२ लाख ५२ हजार रुपैयाँको अलैंची निर्यात भएको थियो ।

गत आर्थिक वर्ष साउनमा ८७ हजार ९ सय किलो अलैंची निर्यात हुँदा चालु आर्थिक वर्षको सोही अवधिमा २ लख १६ हजार १५० किलो अलैंची निर्यात भएको विभागका तथ्यांकमा उल्लेख छ ।

त्यस्तै विभागका अनुसार गत आर्थिक वर्षभर ७ अर्ब ६८ करोड ३७ लाख रुपैयाँको अलैंची निर्यात भएको थियो । यसैबिच हालसम्म नेपालका ४३ जिल्लामा अलैंची उत्पादन हुँदै आएको नेपाल अलैंची व्यवसायी महासंघले जनाएको छ ।