कोरोना संक्रमणले विश्वव्यापी महामारीको रुप लिनसक्ने भन्दै विज्ञहरुको चिन्ता

विभिन्न मुलुकमा संक्रमितहरुको संख्या थपिदै गएपछि कोरोना संक्रमणले विश्वव्यापी महामारीको रुप लिन सक्ने त्रास बढेको भन्दै विज्ञहरुले सचेत गराएका छन् । यसअघि चीनमा मात्रै तीब्र रुपमा फैलिएको कोरोना भाइरसको संक्रमण दक्षिण कोरिया, इटली, इरान लगायत मुलुकमा समेत बढ्दै गएपछि विज्ञहरुले सचेत गराएका हुन् । 

विश्व स्वास्थ्य संगठन डब्लुएचओका प्रमुख टेड्रोस अधानोम गेब्रेससले संक्रमण नियन्त्रण गर्ने ढोकाहरु साँघुरो बन्दै गएको बताउनुभयो । 

बेलायतका प्राध्यापक पल हन्टरले पछिल्लो २४ घण्टाको संक्रमणदर हेर्दा यसलाई नियन्त्रण गर्न सक्ने क्षमतामाथि नै प्रश्न उठेको भन्दै चीनवाहिर फैलिरहेको संक्रमणले चुनौती थपिएको बताउनुभएको छ ।

विश्वका विभिन्न स्थानमा समानान्तर किसिमले संक्रमण बढ्दै गएपछि डब्लुएचओले महामारी घोषणा गर्ने गरेको छ । कोरोना भाइरसका कारण हुने श्वासप्रश्वाससम्बन्धी संक्रमण कोभिड नाईन्टिनविरुद्ध हालसम्म कुनै खोप बनेको छैन ।

चीनमा करिब ७७ हजारमा सो संक्रमण देखा परिसकेको छ । २ हजार ६ सय को मृत्यु भएको छ । अन्य विभिन्न २६ मुलुकमा १ हजार २ सय बढीमा संक्रमण पुष्टी भएको डब्लुएचओले जनाएको छ ।

दक्षिण कोरियामा आज मात्र १ सय ६१ नयाँ संक्रमित फेला परेका छन् । योसंगै कुल संक्रमितको संख्या ७ सय ६० पुगेको छ । संक्रमितमध्ये ११ जना सैनिक छन् । अन्य ७ हजार ७ सय सैनिकलाई क्वारेन्टाइनमा राखिएको छ । 

इटलीमा संक्रमितको संख्या १ सय ५० पुगेको छ भने ३ जनाको संक्रमणबाट मृत्यु भएको छ । इरानमा हिजो मात्र थप ४३ जनामा संक्रमण पुष्टी भएको छ भने संक्रमणबाट १२ जनाको मृत्यु भइसकेको छ ।

अफ्गानिस्तान, कुवेत र बहराईनमा पहिलो संक्रमण पुष्टी भएको छ । इरानबाट फर्किएकामा संक्रमण देखिएको हो ।