अस्ट्रेलिया सरकारले लकडाउन खुकुलो बनाउने, तीन चरणका योजना सार्वजनिक

 कोरोना भाइरस (कोभिड १९) संक्रमण न्यूनिकरणका लागि अस्ट्रेलिया सरकारले लगाएको प्रतिबन्धहरु खुकुलो बनाइने भएको छ । शुक्रबार मन्त्रिपरिषद्‌को छलफलपछि प्रधानमन्त्री स्कट मरिसनले ३ चरणमा प्रतिबन्धलाई खुकुलो पारिने योजना सार्वजनिक गरेका हुन् । उनका अनुसार पहिलो चरणमा क्याफे, रेस्टुरेन्ट, पार्क, क्याम्प लगायत खुल्ला गर्ने निर्णय भएको छ ।

अस्ट्रेलियाले आंशिक लकडाउनमात्र गरेको भए पनि आर्थिक रुपमा ठूलो क्षति बेहोरेपछि जुलाईको अन्त्यसम्ममा आर्थिक गतिविधिलाई पूर्ण रुपले सञ्चालनमा ल्याइने योजनासहित तीन तहको योजना सार्वजनिक गरेका हुन् ।

पहिलो योजनाअन्तर्गत पारिवारिक भेटघाटका लागि ५ जनासम्म भेला हुन पाउने भएका छन् भने बाहिरी क्रियाकलापका लागि १० जनासम्म भेला हुन पाउने छन् । यस पहिले परिवारमा अन्य परिवारका सदस्य १ जनामात्र भेला हुन पाउने नियम थियो भने बाहिरी क्षेत्रमा समूहमा भेला हुन प्रतिबन्ध लगाइएको थियो । अहिलेसम्म टेक अवेमा सीमित रेस्टुरेन्ट तथा क्याफेमा समेत १० जनासम्म सामाजिक दूरी कायम राखेर मात्र खाना खान पाउने छन् । यसका साथै विवाह र मृत्यु संस्कारमा सहभागी हुन पाउने व्यक्तिहरुको संख्यामा समेत वृद्धि गरिएको छ ।

केन्द्रीय सरकारले लकडाउन खुकुलो पार्ने निर्णय गरेपनि स्थानीय तहमा लागू गर्ने निर्णय यहाँका ६ राज्य तथा दुई टेरिटोरी सरकारमा केन्द्रित हुनेछ । सरकारले शुक्रबार ल्याएको योजनालाई सम्पूर्ण राज्य तथा टेरिटोरीका अधिकारीका साथै विज्ञले सकारात्मक भनेको सञ्चारमाध्यमले जनाएका छन् ।

कोरोना भाइरस संक्रमित करिब ९० प्रतिशत निको भइसकेका र नयाँ संक्रमितको संख्यासमेत उल्लेख्य रुपमा कम भएकाले सरकारले यो निर्णय लिएको विश्‍लेषण गरिएको छ ।

दोस्रो योजनामा २० जनासम्मलाई भेला हुन दिइने, जीम, चलचित्र भवन, ब्युटी पार्लर लगायतका व्यवसाय खुल्ला गरिने भएको छ । यहाँका प्रमुख स्वास्थ्य अधिकृत डा। ब्रेण्डन मर्फीले यो चरणमा अधिकांश व्यवसाय खुल्ला हुने भए पनि सामाजिक दूरी लगायतका नियमलाई भने पालना गरिनुपर्ने बताएका छन् । दोस्रो चरणमा विवाहमा २० जनासम्म सहभागी हुन पाउने र मरिमराऊमा ५० जनासम्म भेला हुन पाउनेछन् ।

तेस्रो चरणमा अस्ट्रेलियाको जनजीवन सामान्य हुने प्रधानमन्त्री मरिसनले विश्वास लिएका छन् ।‘आज हामीले अर्थतन्त्र र समाजलाई खुल्ला गर्नका लागि स्पस्ट मापदण्ड ल्याएका छौं, जसले यहाँ जनजीवन र अर्थतन्त्रलाई मजबुत बनाउनेछ’मरिसनले शुक्रबार आयोजना गरिएको नियमित पत्रकार सम्मेलनमा भनेका छन् । उनले यदि भाइरस संक्रमण बढेको खण्डमा सरकारले थप योजना सार्वजनिक गर्ने समेत बताएका छन् ।

केन्द्रीय सरकारको घोषणापछि यहाँका राज्य सरकारले समेत यो योजनालाई तत्कालै लागू गर्ने बताएका छन् । दक्षिण अस्ट्रेलिया, क्युन्सल्यान्ड, पश्चिम अस्ट्रेलिया, एसिटी लगायतका राज्यले अबको एक सातादेखि सरकारले अघि सारेको पहिलो चरणको योजनालाई लागू गरिने बताएका छन् । भाइरसको संक्रमणबाट धेरै पीडित रहेका न्यु साउथ वेल्स र भिक्टोरिया राज्यले भने सरकारको योजनालाई तत्कालै लागू नगर्ने संकेत गरेका छन् । उक्त राज्यका अधिकारीले संक्रमणको अवस्थालाई मध्यनजर गरेर कसरी प्रतिबन्धलाई खुकुलो पार्न सकिन्छ भन्ने निर्णय गरिने बताएका छन् ।

अन्तर्राष्ट्रिय विद्यार्थीमाथिको प्रतिबन्ध दुई महिनापछि खुल्ने

अस्ट्रेलियाले अबको दुई महिनापछि अन्तर्राष्ट्रिय विद्यार्थीलाई आउन दिने भएको छ । समाचारहरुमा जनाइएअनुसार जुलाईदेखि विभिन्न देशमा रहेका अन्तर्रास्ट्रिय विद्यार्थीलाई आउन लगाइएको प्रतिबन्ध खुला गरिने भएको हो । प्रधानमन्त्री मरिसनले सरकारले सम्बन्धित क्षेत्रसँग सरसल्लाह गरेर यसलाई कसरी सुचारु गर्न सकिन्छ भनेर निर्णय लिइने बताएका छन् ।

अस्ट्रेलियामा अहिलेसम्म कोरोना भाइरसका कारण ९७ जनाले ज्यान गुमाएका छन् भने ६ हजार ८ सय ९६ जना संक्रमित छन् । जसमध्ये ६ हजार ३५ जना निको भइसकेका छन् । स्वास्थ्य विभागको तथ्यांकअनुसार विगत २४ घण्टामा जम्मा २२ जना नयाँ संक्रमित भेटिएका छन् भने अहिलेसम्म ७ लाख २२ हजार ५ सयमा परीक्षण गरिसकिएको छ ।