थाईल्यान्डको संवैधानीक अदालतद्वारा प्रधानमन्त्री शिनावात्रालाई पदमुक्त

थाईल्यान्डको संवैधानीक अदालतले प्रधानमन्त्री पेतोङत्रान शिनावात्रालाई पदमुक्त गरेको छ । एक गोप्य टेलिफोन वार्ता सार्वजनिक भएपछि नैतिकता उल्लङ्घन गरेको आरोप खेप्दै आएकी शिनावात्रालाई अदालतले पदमुक्त गरेको हो ।

 गत जुन महिनामा क्याम्बोडियाका पूर्व प्रधानमन्त्रीसँग गरेको गोप्य टेलिफोन संवादमा थाई सेनाको आलोचना गरेको भन्दै शिनावात्रामाथि नैतिकताको प्रश्न उठेको थियो । त्यहाँको संवैधानीक अदालतले शिनावत्राको व्यवहार प्रधानमन्त्रीको जिम्मेवारीअनुसार नभएको ठहर गर्दै पदबाट हटाउने निर्णय गरेको अन्तर्राष्ट्रिय सञ्चार माध्यमले जनाएका छन् ।

 आज भएको अदालतको निर्णयमा ९ मध्ये ६ जना न्यायाधीशले शिनावात्रालाई दोषी रहेको ठहर गरेको समाचारमा उल्लेख छ । कम्बोडियाका पूर्व प्रधानमन्त्री हुन सेनसँग भएको कुराकानीका आधारमा पदमुक्त शिनावात्राले भने दुई देशबीच शान्ति कायम राख्न र हिंसा रोक्नका लागि पहल गरेपनि अदालतबाट भएको निर्णय स्वीकार्य भएको प्रतिक्रिया दिएको अन्तर्राष्ट्रिय सञ्चार माध्यमले जनाएका छन् ।

 प्रधानमन्त्री जिम्मेवारीबाटमुक्त भएसँगै थाइल्यान्डको राजनीतिमा फेरि हलचल मच्चीएको टिप्पणी गरिएको छ ।