न्यूयोर्कमा हुन लागेको राष्ट्रसंघीय विश्व नेताहरूको भेलामा अमेरिकाद्वारा प्यालेस्टाइनका नेतालाई भिसा दिन अस्वीकार

काठमाडौँ । अमेरिकाले आगामी महिना हुने संयुक्त राष्ट्रसंघको विश्व नेताहरूको न्यूयोर्क भेलाका लागि प्यालेस्टाइन प्राधिकरणका अध्यक्ष महमूद अब्बासलाई यात्रा गर्न अनुमति नदिने भएको छ । 

विदेश विभागका एक अधिकारीकाअनुसार अमेरिकाको सो निर्णयले अब्बास र अन्य ८० जना प्यालेस्टीनीहरु प्रभावित हुनेछन् । जसमा अमेरिकाले प्यालेस्टाइन स्वतन्त्र संगठन र वेस्ट बैंकमा आधारित प्यालेस्टाइन प्राधिकरणका सदस्यहरूको भिसा रद्द हुने समाचार संस्था रोयटर्सले जनाएको छ । 

अध्यक्ष अब्बासले राष्ट्रसंघको मुख्यालयमा संयुक्त राष्ट्रसंघको वार्षिक उच्चस्तरीय महासभाको लागि न्यूयोर्क जाने योजना बनाउनुभएको थियो । उहाँले त्यहाँ फ्रान्स र साउदी अरबको आयोजनामा हुने शिखर सम्मेलनमा पनि भाग लिने तयारी गर्नुभएको थियो । सो भेलामा कयौँ अमेरिकाका रणनीतिक सहयोगीहरूले प्यालेस्टाइनलाई राज्यको रूपमा मान्यता दिने तयारी गरेका छन् । जसमा बेलायत, फ्रान्स, अष्ट्रेलिया र क्यानडाले औपचारिक रूपमा प्यालेस्टाइन राज्यलाई मान्यता दिने प्रतिज्ञा गरेका थिए । 

यसैबीच, अब्बासको कार्यालयले अमेरिकाको भिसा निर्णयबाट आश्चर्यचकित भएको र यसले राष्ट्रसंघको सम्झौताको उल्लंघन गरेको तर्क गरेको छ ।