दक्षिण–पूर्वी एसियामा बाढी पहिरोका कारण ३ सय ५० जना बढीको मृत्यु

पछिल्लो एक साताको अवधिमा दक्षिण–पूर्वी एसियाका विभिन्न देशमा विनाशकारी बाढी र पहिरोका कारण ३ सय ५० जना बढीको मृत्यु भएको छ ।

 इन्डोनेसिया, थाइल्याण्ड र मलेसियाका विभिन्न स्थानमा भएका बाढी पहिरोका घटना हुँदा सो संख्यामा हताहती भएको हो । तीन देशमा विभिन्न क्षेत्रमा भएको भारी मनसुनी वर्षाले डुबानको समस्या उत्पन्न भएको छ भने डुबानमा परेका हजारौं नागरिक उद्दारको पर्खाइमा रहेको समाचारमा जनाइएको छ ।

 इन्डोनेसियाको सबैभन्दा बढी प्रभावित क्षेत्र सुमात्रा टापुमा बेपत्ता भएका १ सय बढीको उद्दारका लागि प्रयास भएपनि सो क्षेत्रमा पुग्न समस्या भएको अन्तर्राष्ट्रिय सञ्चार माध्यमले जनाएका छन् । त्यस्तै, इन्डोनेसियाका प्रकोप अधिकारीहरुका अनुसार बाढी र पहिरोमा २ सय भन्दा बढी व्यक्तिको मृत्यु भएको छ । यस्तै दक्षिणी थाइल्याण्डको सोङखला प्रान्तमा एक दशक यताको सबैभन्दा खराब मानिएको बाढीमा कम्तिमा १ सय ४५ जनाको मृत्यु भएको सरकारी अधिकारीहरुले जनाएका छन् ।

यसैबीच सामुन्द्रीक आँधीका कारण प्रभावित भएको श्रीलङ्कामा भारी वर्षा र बाढीका कारण मृत्यु हुनेको संख्या १ सय ३२ पुगेको छ भने १ सय ७६ जना बेपत्ता भएका छन् । 

मानविय क्षति हुने क्रम बढेसंँगै श्रीलङ्काले सहयोगको लागि अन्तर्राष्ट्रिय समूदायसँग अपील गरेको छ । आँधीका कारण १५ हजार घर क्षतिग्रस्त भएका छन् भने ४४ हजार नागरिकलाई राज्यद्वारा सञ्चालित अस्थायी आश्रयस्थलमा राखिएको छ । श्रीलङ्काको राजधानी कोलम्बोबाट १ सय १५ किलोमिटर पूर्वमा रहेको क्यान्डी जिल्लामा पहिरो जाँदा अधिकांश सडक डुवानमा परेको समाचारमा जनाइएको छ ।