भ्रष्टाचारमा जोडिएको भन्दै फिलिपिन्सका राष्ट्रपतिको राजीनामा माग

सरकारी बजेटमा व्यापक भ्रष्टाचार गरेको भन्दै फिलिपिन्समा राष्ट्रपति र उपराष्ट्रपतिको राजिनामा माग गरिएको छ । राजधानी शहर मनिलामा भेला भएका हजारौं सर्वसाधारणले राष्ट्रपति फर्डिनान्ड मार्कोस जुनियर र उपराष्ट्रपति सारा दुतेरेतको राजिनामा माग गरेका हुन् ।

भ्रष्टाचार विरुद्धको नागरिक अभियानको नेतृत्वमा भएको विरोध प्रदर्शनका क्रममा राष्ट्र प्रमुखको राजिनामा माग गरिएको अन्तर्राष्ट्रिय सञ्चार माध्यमले जनाएका छन् । व्यापक चासोका साथ हेरिएको ‘ट्रिलियन–पेसो’ नामक घोटला प्रकरणमा उच्च पदस्थ नेताहरुलाई सहयोग गरेको आरोप उनीहरुमाथि लागेको छ ।

सरकारी योजनाको ठेक्कामा अरबौँ रकम घुस लिएको तथा धेरै निर्माण आयोजनाहरु त्रुटिपूर्ण बनाएको समेत आरोप लागेको समाचारमा जनाइएको छ । हालै आएका दुई शक्तिशाली टाइफुनका कारण २ सय ५० जना बढी मानिसको मृत्यु भइसकेको अवस्थामा भ्रष्टाचारविरुद्धको अभियान तिव्र बनेको हो ।

भ्रष्टाचारको घटना सार्वजनिक भएपछि त्यहाँको सरकारका दुई मन्त्रीले राजीनामा दिएका छन् ।