नेपाल प्रहरीको नयाँ नेतृत्व चयनका लागि सरकार छलफलमा

नेपाल प्रहरीका महानिरीक्षक आईजीपी सर्वेन्द्र खनाल ३० वर्षे सेवा अवधिका कारण पर्सी मंगलबार रातिबाट अवकाश पाउने भएपछि नयाँ नेतृत्वका लागि सरकारले तयारी तीव्र पारेको छ । सोही दिन खनालसँगै एआईजी पुष्कर कार्की, ठूले राई र धीरु बस्न्यातले पनि अवकाश पाउने छन् । 

खनालको अवकाशसँगै मंगलबार नेपाल प्रहरीले २७ औं नयाँ नेतृत्व पाउनेछ । प्रहरीको नयाँ नेतृत्व भने डीआईजीमध्येबाटै हुनेछ । प्रतिस्पर्धामा डीआईजी ठाकुर ज्ञवाली र तारणी लम्साल छन् । उनीहरू दुवै २०४७ असार २५ देखि प्रहरी निरीक्षकबाट सेवा प्रवेश गरेका हुन् ।

सम्भवत: भोलि सोमबार बस्ने मन्त्रिपरिषद् बैठकबाट प्रहरी नेतृत्वको निर्णय हुनेछ । उच्च स्रोतका अनुसार ज्ञवाली नै भावी आईजीपी बन्ने निश्चित प्राय: छ । कार्यसम्पादन मूल्यांकनमा पनि ज्ञवाली पहिलो नम्बरमा हुनुहुन्छ । स्रोत भन्छ यसका लागि प्रधानमन्त्री, गृहमन्त्री सकारात्मक देख्निछन् । ३० वर्षे सेवाहदका कारण ज्ञवालीको कार्यकाल भने जम्मा ५ महिनाको मात्रै हुनेछ । ज्ञवालीको हाल प्रदेश १ प्रहरीको जिम्मेवारी छ ।

प्रहरी नियमावलीमा आईजीपीको नियुक्ती गर्दा ज्येष्ठता, कार्यदक्षता र कार्यसम्पादन मूल्यांकनलाई आधार मान्नुपर्छ । प्रहरी ऐन २०१२ र प्रहरी नियमावली २०७१ मा प्रहरी महानिरीक्षकमा बढुवा गर्दा अतिरिक्त महानिरीक्षक एआईजी मध्येबाट गर्नुपर्ने उल्लेख छ । तर, एआईजी नभएको अवस्थामा सरकारले डीआईजीमध्ये बाटै आईजीपी नियुक्ति गर्न सक्नेछ । तर, सरकारले प्राय: प्रहरी प्रमुखमा आफू अनुकुल व्यक्तिलाई नै छनौट गर्ने प्रचलन छ ।

ज्ञवाली आईजीपी भएको अवस्थामा तीन एआईजीका लागि लम्सालसहित डीआईजी सूर्य उपाध्याय, शैलेश थापा, हरिबहादुर पाल, प्रद्युम्न कार्की, नीरजबहादुर शाही र विश्वराज पोखरेलबीच प्रतिस्पर्धा हुनेछ । एआईजी बढुवामा भने समय लाग्ने सम्भावना छ । पछिल्लो समय डीआईजीबाटै एआईजी बनाउनुपर्ने अवस्था भएपनि २८ औं महानिरीक्षक भने एआईजीबाटै हुनेछ । त्यसैले एआईजीमा पर्न सबैले दौडधूप तीव्र बनाएका छन् । 

वर्तमान आईजीपी खनालका ब्याजी १७ डीआईजीहरू पनि माघ २८ मै अवकाश पाउनेछन् । खनालसहितको यो समूह २०४६ माघ २९ गते प्रहरी निरीक्षकबाट सेवा प्रवेश गरेको हो । डीआईजीसमेत खाली हुने भएकाले एसएसपीहरूबीच पनि बढुवाका लागि प्रतिस्पर्धा हुनेछ ।