सुदूरपश्चिमको नीति तथा कार्यक्रम सार्वजनिक, कृषि क्षेत्रको विकास पहिलो प्राथमिकता

सुदूरपश्चिम प्रदेश सरकारले आगामी आर्थिक वर्षको नीति तथा कार्यक्रम सार्वजनिक गरेको छ । प्रदेशसभाको बुधबारको बैठकमा प्रदेश प्रमुख देवराज जोशीले प्रस्तुत गरेको आगामी आर्थिक वर्षको नीति तथा कार्यक्रममा विगत झै थुप्रै आकर्षक नाराहरु उल्लेख छन् । तर उल्लेखित कार्यक्रमहरुको कार्यान्वयन तथा नतिजाको विश्वसनीय आधार भने प्रष्ट छैन ।

 ‘ब्यवसायिक कृषिका लागि शून्य ब्याजदरमा ऋण’ कार्यक्रमको घोषणा गरेको सरकारले कृषि क्षेत्रको विकासलाई पहिलो प्राथमिकतामा राखेको छ । प्रदेश सरकार कृषकको सहयोगी, कृषिमा आत्मनिर्भर सुदूरपश्चिम अभियान, एक स्थानीय तह एक कृषक पाठशाला लगायत कार्यक्रम ल्याइने नीति तथा कार्यक्रममा समेटिएका छन् । 

पर्यटन पूर्वाधार विकास, एकीकृत वस्ती विकास, उद्योग, शिक्षा, स्वास्थ्य, खेलकुद लगायत क्षेत्रको विकास समेट्ने गरी आकर्षक नारासहितका कार्यक्रम नीति तथा कार्यक्रममा समेटिएका छन् । पर्यटन पूर्वाधार समृद्ध प्रदेशको आधार नारा दिदै सरकारले मुख्यमन्त्री एकीकृत पर्यटन विकास कार्यक्रम सञ्चालन गर्ने उल्लेख गरेको छ ।

सुदूरपश्चिम प्रदेश सरकारले थारु जातिको बरघर प्रथालाई संरक्षण र प्रवर्धन गर्ने, गोदावरी–धनगढी मनोरेल सेवा सञ्चालनका लागि सम्भाव्यता अध्ययन गर्ने जनाएको छ । यस्तै सेती, कर्णाली र महाकाली नदीमा जल यातायात सञ्चालनका लागि अध्ययन गर्ने पनि नीति तथा कार्यक्रममा उल्लेख छ । कैलालीको गोदावरीमा चिडियाखाना स्थापना गर्ने कार्यक्रम पनि प्रदेश सरकारले अगाडी सारेको छ । 

आगामी आर्थिक वर्षका लागि एक जिल्ला एक उद्योग, बैदेशिक रोजगारीका क्रममा भन्सार बिन्दुबाट बाहिरिनेको अभिलेख राखिने, मुख्यमन्त्री शैक्षिक पूर्वाधार विकास तथा गुणस्तर सुधार कार्यक्रम, बादी उत्थान छात्रवृत्ति कार्यक्रम, विपन्न वर्ग तथा शहिद बेपत्ता परिवारका विद्यार्थीहरुलाई एमबीबीएस र एमडी अध्ययन गर्न छात्रवृत्ति, प्रदेश प्रमुख एकीकृत वस्ती विकास परियोजना लगायत कार्यंक्रमलाई महत्वका साथ नीति तथा कार्यक्रममा समेटेको छ ।