नेपाली भूमि भारतीय नागरिकले भोगचलन गरिरहेको विषयः गम्भीरतापूर्वक लिएको गृहमन्त्री लेखकको भनाई

सरकारले कञ्चनपुरको शुक्लाफाँटास्थित नेपाली भूमिमा भारतीय नागरिकले भोगचलन गरिरहेको विषयलाई गम्भीरतापूर्वक लिएको जनाउँदै कुटनीतिक माध्यमबाट समाधान गर्ने बताएको छ । गृहमन्त्री रमेश लेखकले सरकार नेपाली भूमि र सीमाको रक्षा गर्न सरकार कटिबद्ध रहेको बताउनुभएको हो । प्रतिनिधिसभाको राज्यव्यवस्था तथा सुशासन समितिको बैठकमा उहाँले राज्यका संयन्त्र र सुरक्षा निकायबाट भारतीय नागरिकले नेपाली भूमिमा खेतीपाती गरिरहेको बिषयबारे जानकारी आएको बताउनुभयो ।

मन्त्री लेखकले सो क्षेत्रमा पिल्लर राख्ने सहमति दुई देशबीच भएकाले अहिले उठेको बिषयलाई कुटनीतिक तवरबाट समाधान गरिने प्रतिवद्धता जनाउनुभयो । भारतका नागरिकले नेपाली भूमिको भोगचलन गरेको बिषयमा कूटनीतिक माध्यमबाट छलफल भइरहेको जानकारी दिनुभयो ।

यसअघि सत्तारुढ नेपाली कंग्रेस र एमालेका सांसदले कञ्चनपुरमा नेपाली भूमि भारतीय नागरिकले भोग चलन गरिरहेको विषयमा सरकारको ध्यानाकर्षण गराएका थिए । नेपाली कांग्रेसका सांसद दिलेन्द्रप्रसाद बडू र एमाले सांसद रघुजी पन्तले सो बिषय समितिमा उठाउनुभएको थियो ।