माओवादी केन्द्रले अर्को चुनावसम्म गठबन्धन गर्दैनः अध्यक्ष दाहाल

नेकपा माओवादी केन्द्रले आगामी निर्वाचनसम्म चुनावी गठबन्धन नगर्ने बताएको छ ।

दाङको घोराहीमा आज आयोजित पत्रकार भेटघाट कार्यक्रममा माओवादी केन्द्रका अध्यक्ष पुष्पकमल दाहालले २०८४ को निर्वाचन सम्म कुनै पनि दलसँग सहकार्य गरेर चुनाब नलड्ने बताउनुभएको हो ।

अध्यक्ष दाहालले धेरै दलसँग सहकार्य गरेर अनुभव गरिसकेको र आगामी निर्वाचन सम्म एमालेसँंग चुनावी सहकार्य गर्ने सम्भावना नरहेको उल्लेख गर्नुभयो । यसअघिको उपचुनावमा समेत एक्लै लडेर परिक्षण गरिसकेको र राम्रै नतिजा आएकाले अहिले देशव्यापी अभियानमा हिडिरहेको उहाँको भनाई थियो ।

अध्यक्ष दाहालले २०८४ को चुनावमा पनि विगतको माओवादीलाई नभई सुध्रिएको माओवादीलाई भोट मागेको जिकिर गर्नुभयो । त्यस्तै अध्यक्ष दाहालले सत्तामा धेरै कुरा सेटिङमा चल्ने गरेको आरोप लगाउनुभयो ।