सरकारका सकारात्मक काममा एक ठाँउमा उभिएर अघि बढ्ने सत्तारुढ दलको निष्कर्ष

सत्तारुढ दलको बैठकले संसदको काम कारबाहीमा तथा सरकारका सकारात्मक कामका बारेमा एक ठाँउमा उभिएर अघि बढ्ने निष्कर्ष निकालेको छ । प्रधानमन्त्री निवास बालुवाटारमा आज साँझ बसेको सत्तारुढ दलको बैठकले सरकारका कामलाई अझ प्रभावकारी बनाउनका लागि सबैले सहयोग गर्ने सहमति भएको हो । 

त्यस्तै, संसदको हिउँदे अधिवेशनमा बढीभन्दा बढी कानुन निर्माण गर्ने निर्णय समेत गरेको छ । बैठकपछि सञ्चारकर्मीहरूसँग कुरा गर्दै नेकपा एमालेका प्रमुख सचेतक महेश बर्तौलाले संसदका काम कारबाहीमा सत्तारुढ दल एक ठाउँमा उभिने सहमति भएको र सरकारका काम प्रति समर्थन जनाउँदै अघि बढ्ने निष्कर्ष बैठकले निकालेको जानकारी दिनुभयो ।

प्रमुख सचेतक बर्तौलाले संसदको बैठकमा प्रधानमन्त्री सहित शीर्ष नेताहरुले सम्बोधन गर्नुहुने र संसदको काम कारबाहीमा सत्तारुढ दलहरु एक ठाउँमा उभिएर सशक्त र बलियो बनाउँदै लैजाने निर्णय भएको उल्लेख गर्नुभयो ।