बालेन्द्रको अवरोधकाबीच कामपाका प्रमुख प्रशासकीय अधिकृत गुरागाई कार्यालयमा हाजिर

काठमाडौं महानगरपालिकाका मेयर बालेन्द्र साहको अवरोधकाबीच प्रमुख प्रशासकीय अधिकृत सरोज गुरागाई कार्यालयमा हाजिर हुनुभएको छ । महानगरले तैनाथ गरेका नगरप्रहरीलाई छिचोल्दै उहाँ कार्यालय पुग्नुभएको हो । कर्मचारीहरूले सुरक्षा दिएर गुरागाईलाई कार्यकक्षसम्म पु¥याएका थिए ।

गुरागाईको कार्यकक्षमा लगाइदिएको ताला कर्मचारीले तोडिदिएका छन् । गुरागाईंलाई महानगरपालिकामा रोक्न मेयर साहले नगर प्रहरी परिचालन गरी अवरोध गरेको कर्मचारीले आरोप लगाएका छन् । हाजिर हुन महानगरपालिका पुगेका गुरागाईंलाई नगर प्रहरीले गेटमै अवरोध गर्न खोजेका थिए । तर, कर्मचारीहरुले उहाँलाई कार्यालय प्रवेश गराएर हाजिर गराएका हुन् ।

रत्नपार्क क्षेत्रमा बनिरहेको व्यवसायिक भवनको नक्सा अनधिकृतरुपमा पास गरेको भन्दै मेयर साहले गुरागाईलाई कार्यालय प्रवेशमा रोक लगाउँदै आउनुभएको थियो । मेयरसँगको विवादपछि गुरागाई गत पुस ७ गतेदेखि बिदामा बस्नुभएको थियो ।

प्रमुख प्रशासकीय अधिकृत नहुँदा महानगरपालिकाका कर्मचारीले तीन महिनादेखि तलबभत्ता पाएका छैनन् भने महानगरपालिकाको दैनिक सेवा समेत प्रभावित हँुदै आएको छ ।