रास्वपाद्वारा राष्ट्रिय मानवअधिकार आयोगको ध्यानाकर्षण

राष्ट्रिय स्वतन्त्र पार्टी (रास्वपा) ले सभापति रवि लामिछानेलाई सहकारी ठगी प्रकरणमा पछिल्लो पटक पक्राउ गर्ने क्रममा राज्यको तर्फबाट मानवअधिकारको गम्भीर उल्लंघन भएको भन्दै राष्ट्रिय मानवअधिकार आयोगको ध्यानाकर्षण गराएको छ । प्रहरीले लामिछानेलाई गत शुक्रबार राति काठमाडौंको हात्तिगौडास्थित निवासबाट पक्राउ गरेको थियो । 

सोही क्रममा प्रहरीले सामान्य कानुनी प्रक्रिया पनि पूरा नगरेको भन्दै रास्वपाका नेताहरुले आयोगमा निवेदन दिएका हुन् । सो पार्टीका कार्यवाहक महामन्त्री कविन्द्र बुर्लाकोटीले लामिछानेको मानवअधिकार उल्लंघन भएकाले त्यसबारे आयोगमा निवेदन दिइएको बताउनुभयो ।

रास्वपाकोे निवेदनमा लामिछाने विरुद्ध अस्वाभाविक, अशोभनीय, गैरकानुनी कार्य भएको, प्रहरीले असामान्य व्यवहार गरी अभद्र शैली अपनाएको, तथा शयन कक्षमै पुगेर धरपकड गरेको लगायत विषय समावेश गरिएको कार्यवाहक महामन्त्री बुर्लाकोटीले बताउनुभयो ।

यसैबीच, सभापति लामिछाने थुनामा परेपछि भावी रणनीति तय गर्न राष्ट्रिय स्वतन्त्र पार्टी आन्तरिक बैठकमा जुटेको छ ।