चैत १५ को हिंसात्मक घटनाबारे न्यायिक आयोग गठन सरकारको अस्विकार

काठमाडौंको तीनकुनेमा गत चैत १५ गते भएको हिंसात्मक घटनाबारे न्यायिक आयोग गठन गर्नुपर्ने प्रतिपक्षी राप्रपा लगायत दलको मागलाई सरकारले अस्वीकार गरेको छ । 

संसदको कानून समितिको बैठकमा बोल्दै गृहमन्त्री रमेश लेखकले नियमित फौजदारी प्रणाली अनुसार कारवाही प्रक्रिया अघि बढेको भन्दै छुट्टै आयोग बनाउन आवश्यक नभएको बताउनुभएको हो ।

यसैबीच समिति बैठकमा बोल्दै सत्तारुढ नेपाली कांगे्रस र एमालेका सांसदहरुले चैत १५ गतेको घटनामा पूर्वराजा ज्ञानेन्द्र शाहलाई समेत जवाफदेही बनाउन माग गरेका छन् । नेपाली कांग्रेसका सांसद जीवन परियारले सो घटनाबारे बुझ्न पूर्वराजा शाहलाई संसदीय समितिमा बोलाउनुपर्ने बताउनुभयो ।

एमाले सांसद महेश बर्तौलाले चैत १५ गतेको घटनामा पूर्वराजालाई जवाफदेही बनाउन माग गर्नुभयो । राप्रपाका सांसद धु्रववहादुर प्रधानले भने तीनकुने घटनाको जिम्मेवारी प्रधानमन्त्री केपी ओलीले लिनुपर्ने बताउनुभएको थियो ।