एमसीसीअन्तर्गतका परियोजनाको काम अघि बढ्दै, विद्युत प्रसारणलाइनका लागि आज ठेक्का सम्झौता हुने

अमेरिकी सहयोग नियोग मिलेनियम च्यालेन्ज कर्पोरेसन (एमसीसी)को अनुदान सहयोगमा बन्ने दुई खण्डको ठेक्कामा आज सम्झौता हुने भएको छ । एमसीसीअन्तर्गत निर्माण हुने २९७ किलोमिटर ४०० केभी डबल सर्किट प्रसारणलाइनमध्येको दुई खण्ड निर्माणका लागि आज ठेक्का सम्झौता हुने एमसीए नेपालले जनाएको छ । नुवाकोटको रातमाटे–नयाँ दमौली प्रसारणलाइन निर्माणका लागि ठेक्का सम्झौता हुन लागेको हो । एन्जेलिक–स्किपर जेभीसँग सात करोड ७४ लाख ८० हजार अमेरिकी डलरमा ठेक्का सम्झौता हुन लागेको बताइएको छ । त्यस्तै, दमौली–नयाँ बुटवल प्रसारणलाइन निर्माण गर्न नेपाली निर्माण कम्पनी वाइबा–सलासार जेभीसँग सात करोड ७० लाख ३० हजार अमेरिकी डलरमा सम्झौता हुन लागेको एमसीएले जनाएको छ । यी परियोजना निर्माण भएपछि विद्युत् प्रसारणमा नेपालकालागि ठूलो फड्को हुनेछ ।