नेपाल प्रहरीको ३२ औं महानिरीक्षक चन्द्र कुवेर खापुङ बन्ने

मन्त्रिपरिषद्को बैठकले प्रहरी महानिरीक्षक(आईजीपी)मा चन्द्र कुवेर खापुङलाई नियुक्त गर्ने निर्णय गरेको छ । 

आजको बैठकले हाल प्रहरीको केन्द्रीय अनुसन्धान ब्युरो (सीआईबी) प्रमुखका रुपमा रहेका एआईजी खापुङलाई नयाँ आईजीपी नियुक्त गर्ने निर्णय गरेको छ । सो निर्णयसँगै खापुङ भदौ १८ गतेदेखि नेपाल प्रहरीको ३२ औं महानिरीक्षकको जिम्मेवारीमा रहनुहुनेछ ।

 खापुङ २०५२ सालमा नेपाल प्रहरीको सेवामा प्रवेश गर्नुभएको थियो । उहाँ अहिले केन्द्रीय अनुसन्धान ब्युरो प्रमुखको जिम्मेवारीमा हुनुहुन्छ । इटाली, कोरिया, भियतनाम र चीनबाट विभिन्न सुरक्षासम्बन्धी तालिम लिएका खापुङसँग काठमाडौं उपत्यका अपराध महाशाखा प्रमुख र कोशी प्रदेश प्रहरी प्रमुखको जिम्मेवारी सम्हालिसकेको अनुभव छ ।