चीन भ्रमणबारे प्रधानमन्त्री ओलीले गराए सदनलाई जानकारी

प्रतिनिधिसभाको बैठकमा भोलिदेखि हुने चीन भ्रमणका बारेमा प्रधानमन्त्री केपी शर्मा ओलीले सदनलाई जानकारी गराउनु भएको छ । प्रधानमन्त्री ओलीले भोलि भदौ १४ गतेदेखि १८ गतेसम्म चीनका राष्ट्रपति सी जिन पिङको निमन्त्रणा चीन जान लागेको बताउनुभएको हो । उहाँले चीनको तियानजिनमा आयोजना हुने सांघाई सहयोग संगठन (एससीओ) शिखर सम्मेलनमा सहभागी नेपाली प्रतिनिधिमण्डलको नेतृत्व गर्दै त्यसतर्फ जान लागेको जानकारी दिनुभएको हो ।

 प्रधानमन्त्री ओलीले भ्रमणबाट नेपाल–चीन मैत्रीपूर्ण सम्बन्ध थप सुदृढ हुने र अन्तर्राष्ट्रिय मञ्चमा नेपालको अवधारणा र प्राथमिकता स्पष्ट रुपमा प्रस्तुत हुने विश्वास व्यक्त गर्नुभयो ।  प्रधानमन्त्रीले ओलीले भ्रमणमा नेपालको हित र प्रतिष्ठालाई माथि उठाउने गरी काम गर्नेमा विश्वस्त रहन समेत आग्रह गर्नुभयो । प्रधानमन्त्री ओलीले भ्रमणको मूल उद्देश्य एससीओ सम्मेलनमा नेपालको दृष्टिकोण र प्राथमिकता प्रस्तुत गर्नु रहेको बताउनुभयो । 

उहाँकाअनुसार भ्रमणका क्रममा चीनका राष्ट्रपति सी चिनफिङ तथा उपराष्ट्रपति हान चङ्गसँग द्विपक्षीय भेटवार्ता गर्ने कार्यक्रम समेत रहेको छ । एससिओ शिखर सम्मेलनका दौरान विभिन्न मित्र राष्ट्रका राष्ट्र तथा सरकार प्रमुखसँग नेपालसँग सम्बन्धित द्विपक्षीय तथा अन्य प्राथमिकताका विषयमा छलफल हुने उहाँले जानकारी दिनुभयो । प्रधानमन्त्री ओलीले बेइजिङमा आयोजित फासिवाद विरोधी युद्ध र जापानी अतिक्रमण विरुद्धको ८०औँ वार्षिकोत्सव समारोहमा सहभागी हुने समेत बताउनुभयो ।