जेनजी प्रतिनिधिको सबै माग अहिले पुरा गर्न सकिँदैनः मन्त्री पुन

अन्तरिम सरकारका एक जना मन्त्रीले जेन जीका प्रतिनिधिको सबै माग अहिले पुरा गर्न नसकिने भन्दै आफै चुनाव लडेर सरकार बनाउन आग्रह गरेका छन् ।

जेन जी टु नामक समूहका प्रतिनिधिले बुझाएको मागपत्र बुझ्दै शिक्षा, विज्ञान तथा प्रविधि मन्त्री महावीर पुनले जेनजीका प्रतिनिधिलाई सबै माग पूरा गर्न नसकिने बताउनुभएको हो ।

विभिन्न जेन जी समूहले प्रधानमन्त्री र मन्त्रीहरुलाई ज्ञापन पत्र बुझाउने क्रम बढिरहेका बेला मन्त्री पुनको धारणा सार्वजनिक भएको हो । उहाँले गाउँ–गाउँ गएर चुनावमा युवा नेतालाई जिताउन आग्रह समेत गर्नुभयो ।

जेन जी आन्दोलनका मुख्य अगुवाहरुले आन्दोलनको एजेन्डा कार्यान्वयन गर्ने भन्दै सरकारसँग सम्झौता गर्न संयुक्त मस्यौदा बुझाएपनि जेन जीका नाममा विभिन्न समूहले भिन्दाभिन्दै माग राख्दै आएका छन् ।

यसैबीच, राजतन्त्रको पक्षमा देखिएको एक जेन जी समूहले भोलि काठमाडौंमा उन्नत प्रजातन्त्रसहितको संवैधानिक राजसंस्था बिषयक अन्तक्रिया आयोजना गरेको छ । जेन जी एलायन्स फर मोनार्की नामक समूहले सो कार्यक्रम आयोजना गरेको हो।