एमालेद्वारा ११ औं महाधिवेशनका लागि देशभरबाट २२ सय प्रतिनिधि चयन

एमालेले यही मंसिर अन्तिम साता हुने ११ औं महाधिवेशनका लागि देशभरबाट प्रतिनिधि चयन गरिएका छन् । प्रदेश कमिटी, विशेष जिल्ला कमिटी, प्रतिनिधिसभा निर्वाचन क्षेत्र र ट्रेड युनियन लगायत सांगठनिक संरचनाबाट गरी झन्डै २ हजार दुई सय महाधिवेशन प्रतिनिधि छनोट गरिएको हो ।

एमालेका अनुसार विभिन्न जिल्लामा सर्वसम्मत रुपमा प्रतिनिधि चयन भएका छन् भने केही जिल्लामा मतदान भएको विवरण प्राप्त भएको छ । भावी नेतृत्वका लागि वर्तमान अध्यक्ष केपी शर्मा ओली र वरिष्ठ उपाध्यक्ष इश्वर पोखरेलबीच प्रतिस्पर्धा हुने भएपछि महाधिवेशन प्रतिनिधिका लागि तल्लो तहसम्म त्यसको प्रभाव परेको नेताहरुले बताएका छन् ।

एमाले महासचिव शंकर पोखरेलको गृहजिल्ला दाङ तथा धनकुटा र मोरङमा भने प्रतिनिधि छनोटका क्रममा विवाद भएको समाचार प्राप्त भएको छ । पछिल्लो विवरण अनुसार भक्तपुर, इलाम, म्याग्दी, बाग्लुङ, दाङ, दोलखा लगायत जिल्लामा सर्वसम्मतिमा महाधिवेशन प्रतिनिधि छानिएका छन् । अघिल्लो महाधिवेशनमा एउटै प्यानलबाट निर्वाचित अध्यक्ष र वरिष्ठ उपाध्यक्ष पोखरेलबीच आगामी महाधिवेशनमा अध्यक्ष पदका लागि प्रतिस्पर्धा हुँदा संस्थापन पक्षकै दुई वटा समूहबीच नेतृत्वको होडबाजी देखिएको छ ।

एमालेका अनुसार, प्रदेश कमिटीबाट ४५, प्रतिनिधिसभा निर्वाचन क्षेत्रबाट करिब एक हजार, विशेष जिल्ला कमिटीबाट ४७, दलितबाट ८१, ट्रेड युनियनबाट ४० प्रतिनिधि छानिनेछन् । विधानअनुसार महाधिवेशनमा आयोजक केन्द्रीय कमिटीबाट तीन सय ५४ स्वतः प्रतिनिधि बन्नेछन् ।

त्यस्तै केन्द्रीय अनुशासन आयोगबाट २९, लेखा आयोगबाट ३०, निर्वाचन आयोगबाट २५ र सल्लाहकार परिषदबाट २५ प्रतिनिधि गरी चार सय ६४ स्वतः प्रतिनिधि आउने एमालेले जनाएको छ । एमालेको केन्द्रीय सचिवालय बैठकले प्रतिनिधिसभा निर्वाचन क्षेत्रलाई आधार मानी प्रति एक हजार २ सय संगठित सदस्य बराबर दुई खुला प्रतिनिधि र एक महिला एक प्रतिनिधि हुनुपर्ने व्यवस्था गरेको थियो । एमालेको महाधिवेशन यही मंसिर २७ देखि २९ गतेसम्म काठमाडौंमा हुँदैछ ।