सवारी साधनमा जोरबिजोर प्रणाली लागू गर्ने विषयमा छलफल हुँदै

पश्चिम एसियामा जारी द्वन्द्वका कारण अन्तर्राष्ट्रिय बजारमा कच्चा तेलको मूल्य बढेपछि पेट्रोलियम पदार्थको खपत घटाउन सरकारले सवारीसाधनमा जोरबिजोर प्रणाली लागू गर्ने विषयमा छलफल अघि बढाएको छ । उद्योग, वाणिज्य तथा आपूर्ति मन्त्रालयले इन्धन खपत कम गर्न सार्वजनिक सवारीसाधन जोरबिजोर नम्बरका आधारमा सञ्चालन गर्ने गरी छलफल अघि सारेको हो । मन्त्रालयका प्रवक्ता नेत्रप्रसाद सुवेदीका अनुसार सवारीसाधन जोरबिजोर नम्बरका आधारमा सञ्चालन गर्ने विषयमा छलफल भए पनि कहिलेदेखि लागु गर्ने भनेर निर्णय भइसकेको छैन । इन्धनको खपत कम गर्न बिजुलीको प्रयोग बढाउन र विकल्पमा इन्डक्सन चुलो र राइस कुकर प्रयोग गर्न उहाँले जोड दिनुभएको छ । 

यता यातायात व्यवस्था विभागले पनि यस विषयमा यातायात व्यवसायीसँग छलफल गर्न लागेको जनाएको छ । विभागले आज निजी व्यवसायीलाई बोलाएर सवारीसाधनमा जोरबिजोर सञ्चालन गर्नेलगायतका विषयमा छलफल गर्न लागेको हो । पश्चिम एसियामा युद्धका कारण अन्तर्राष्ट्रिय बजारमा कच्चा तेलको मूल्य बढेर प्रतिब्यारेल १०२ अमेरिकी डलर पुगेको छ । अन्तर्राष्ट्रिय बजारमा मूल्य बढ्दा त्यसको प्रभाव स्थानीय बजारमा परेको हो । 

इन्डियन आयल कर्पोरेसन (आइओसी) ले गत साता मूल्य बर्णपछि नेपाल आयल निगमले पेट्रोलमा १५ र डिजेल÷मट्टितेलमा १० रुपियाँ मूल्य बढाएको थियो । यसैबिच अन्तर्राष्ट्रिय बजारमा कच्चा तेलको मूल्य बढे पनि आयातसमेत बढेको छ । भन्सार विभागका अनुसार चालु आर्थिक वर्ष २०८२÷८३ को आठ महिनामा पेट्रोलियम पदार्थको आयात बढेको छ । चालु आवको माघको तुलनामा फागुन महिनामा डिजेल, पेट्रोल, हवाई इन्धन र खाना पकाउने एलपी ग्यासको आयात बढेको हो ।