यातायात व्यवस्था कार्यालयका कर्मचारीसहित १७ जना विरुद्ध आरोपपत्र दायर

नक्कली सवारी चालक अनुमति पत्र दिएको आरोपमा अख्तियार दुरुपयोग अनुसन्धान आयोगले यातायात व्यवस्था कार्यालयका कर्मचारीसहित १७ जना विरुद्ध विशेष अदालतमा आरोप पत्र दायर गरेको छ । आयोगका अनुसार ललितपुरको एकान्तकुनास्थित यातायात व्यवस्था कार्यालयका मेकानिकल इन्जिनियर विजय राज गिरी, कमल स्याङतान र सिनियर मेकानिक्स अच्युत प्रसाद फुयाल लगायत कर्मचारी र ५ जना बिचौलियाविरुद्ध मुद्धा दायर गरिएको हो ।

त्यस्तै, सवारी चालक अनुमति–पत्रको नवीकरण गर्ने क्रममा गलत नियतले मातहतका कर्मचारीहरुलाई अख्तियारी प्रदान गरेको देखिएपछि तत्कालीन कार्यालय प्रमुख सम्बरबहादुर कार्की र राजुभाइ कुस्माविरुद्ध समेत आरोप पत्र दायर गरिएको अख्तियारले जनाएको छ । स्वत रद्द भएका ५ सय ३३ जना सवारी चालकको नाममा जारी भएको सवारी चालक अनुमति पत्र गैरकानुनी रुपमा नविकरण गरेको उनीहरुमाथि आरोप छ ।