कान्तिपुरका अध्यक्ष सिरोहिया पक्राउ विरुद्ध जनकपुरमा प्रदर्शन

कान्तिपुर मिडिया ग्रुपका अध्यक्ष कैलाश सिरोहियालाई पक्राउ गरिएको विरोधमा जनकपुरमा प्रदर्शन भएको छ । धनुषाको जनकपुरधाममा जनकपुर उद्योग वाणिज्य संघ, पत्रकार, व्यवसायी, नेपाल विद्यार्थी संघ लगायतले प्रदर्शन गरेका हुन् । 

सिरोहियालाई पक्राउ गरेको विरोधमा नेपाली कांग्रेसनिकट विद्यार्थी संगठन नेविसंघका नेता कार्यकर्ताले प्रदर्शन गर्दै धनुषा जिल्ला अदालत पुग्न खोज्दा प्रहरीले रोकेको हो ।

यसैबीच जिल्ला प्रहरी कार्यालय नजिकै प्रहरी र नेपाल विद्यार्थी संघका कार्यकर्ताबीच घम्साघम्सी भएको छ । कान्तिपुरका अध्यक्ष सिरोहियालाई रिहाइको माग गर्दै नेविसंघले गरेको प्रदर्शनमा प्रहरी र विद्यार्थीबीच घम्साघम्सी भएको हो । 

जनकपुरधाम उद्योग वाणिज्य संघको अगुवाइमा सिरोहिया पक्राउको विरोधमा निकालिएको र्‍यालीलाई जिल्ला प्रसाशन कार्यालय भन्दा करिब ५ मिटर वरै रोकिएको थियो । तर, पछि नेविसंघले विरोध जुलुस निकाल्दै सुरक्ष घेरा तोडेपछि प्रहरी र विद्यार्थीबीच झडप भएको हो । अहिले पनि घम्साघम्सी जारी छ ।