गुल्मीमा पहिरोमा पुरिएर ४ जनाको मृत्यु, एक बेपत्ता

अविरल वर्षापछि खसेको पहिरोमा पुरिएर गुल्मीमा ४ जनाको मृत्यु भएको छ । एक जना बेपत्ता भएका छन् । 

मालिका गाउँपालिका–६ अर्जे ठाँटीस्थित भेषबहादुर विकको घर पहिरोले पुरिँदा उनीसहित ४ जनाको मृत्यु भएको जिल्ला प्रहरी कार्यालयका प्रहरी उपरीक्षक एसपी राजन भुजेलले बताउनुभयो । 

मालिका–६ का वडाध्यक्ष दिपक भण्डारीका अनुसार पहिरोमा पुरिएर भेष बहादुर विक, उनकी बुहारी सीता विक, नातिनी सपना र विपना विकको मृत्यु भएको हो । 

पहिरोमा पुरिएर हराईरहेकी भेष बहादुरकी श्रीमती सुन्तली विकको भने खोजी भईहेको वडाध्यक्ष भण्डारीले जानकारी दिनुभयो । 

गएराति परेको अविरल वर्षासँगै पहिरो खसेको जानकारी पाएपछि इश्मा प्रहरी चौकी र जिल्ला प्रहरी कार्यालयबाट टोली खटिएको एसपी भुजेलले जानकारी दिनुभयो ।