रुकुम पश्चिमको आठविसकोटमा बाढीले बगाउँदा ३ को मृत्यु, १ बेपत्ता

रुकुम पश्चिमको आठविसकोट नगरपालिका-१२ बगर नजिक तातोपानी खोलाले बगाउँदा ३ जना बालिकाको मृत्यु भएको छ । एक जना बेपत्ता भएका छन् । 

गएराति परेको वर्षापछि तातोपानी खोलमा आएको बाढीले घर बगाउँदा स्थानीय ८ वर्षीया हितमाया पुन, ५ वर्षीय धनिषा पुन र ४ वर्षीया मनिसा सार्कीको मृत्यु भएको आठविसकोट नगरपालिकाका प्रमुख रवि केसीले जानकारी दिनुभयो । 

यस्तै, स्थानीय झिन्चौर खोलाले बगाउँदा ४० वर्षीय डिल्ली बुढाथोकी बेपत्ता भएका हुन् । साथै यही बाढीमा परेर ७ जना घाइते भएको नगर प्रमुख रवि केसीले जानकारी दिनुभयो । 

घाइते हुनेमा १० वर्षीय विजय सार्की, २२ वर्षीया अनिसा पुन, २९ वर्षीय जनक खत्री, ६५ वर्षीया मनसरी पुन, ४ वर्षीय मेक्सन पुन, २० वर्षीया धनमाया पुन र ६५ वर्षीया कल्पना कामी रहेका छन् । घाइतेको आठविसकोटस्थित नगर अस्पतालमा उपचार भइरहेको छ ।