क्रिकेटर लामिछाने विरुद्ध पुनरावेदन नदिन गौशला २६ को निवेदन

जबरजस्ती करणी मुद्दामा क्रिकेटर सन्दिप लामिछानेलाई उच्च अदालत पाटनले सफाई दिएको फैसला विरुद्ध पुनरावेदन नदिन पीडित गौशला २६ ले निवेदन दिएकी छन् । 

पीडित गौशला २६ ले मुद्दाको कारवाही अगाडी नबढाउन केहीदिन अघि सरकारी वकिलको कार्यालयमा निवेदन दिएकी हुन् । 

उनले लामिछानेविरुद्धको जबरजस्ती करणीको मुद्दा सर्वोच्च अदालतमा पुनरावेदन नगरिदिन लिखित निवेदन मार्फत माग गरेको पत्र सार्वजनिक भएको हो । यद्यपी, सरकारी वकिलको कार्यालयले भने पुनरावेदनमा जाने नजाने विषयमा निर्णय गर्न नमिल्ने बताएको छ । 

सो मुद्दा दर्ता भए लगत्तै देखि गौशला २६ ले आफूलाई मानसिक एवम् सामाजिक असर परेको निवेदनमा उल्लेख गरेकी छन् । गत जेठ २ गते जिल्ला अदालत काठमाडौंले गरेको फैसला उल्ट्याउँदै उच्च अदालत पाटनले क्रिकेटर लामिछानेलाई बलात्कार मुद्दामा सफाइ दिएको थियो ।

 उच्च अदालत पाटनका न्यायाधीशद्वय सुदर्शनदेव भट्ट र अञ्जु उप्रेती ढकालको इजलासले जिल्ला अदालत काठमाडौंको फैसलालाई उल्ट्याउँदै लामिछानेलाई बलात्कार मुद्दामा सफाइ दिएको थियो । 

काठमाडौं जिल्ला अदालतले भने लामिछानेलाई बलात्कार मुद्दामा दोषी ठहर गर्दै गत पुषमा ८ वर्षको कैद र ५ लाख जरिवानाको सजाय सुनाएको थियो ।