बाघको आक्रमणबाट पर्सामा एक वृद्धको मृत्यु

पर्साको जिराभवानी गाउँपालिका–५ मा बाघको आक्रमणबाट एक वृद्धको मृत्यु भएको छ । बाघको आक्रमणबाट जिराभवानी–५ का स्थानीय ६० वर्षीय तुलसी राउत थारुको मृत्यु भएको हो । 

शुक्रबार अपराह्न घर नजिकको जंगलमा घाँस काट्न गएका थारु राति नफर्किए पछि आज बिहान खोजी गर्ने क्रममा उनको शव भेटिएको इलाका प्रहरी कार्यालयका प्रहरी निरीक्षक मोहनजङ बुढाथापाले जानकारी दिनुभयो । उहाँका शव पोस्टमार्टमका लागि वीरगञ्जस्थित नारायणी अस्पताल पठाइएको छ । 

जंगलको करीब २ सय ५० मिटरभित्र उनको शव फेला परेको थियो । मानव बस्तीको करीब १ किलोमिटरसम्म बाघ आइपुगेकाले नियन्त्रणका लागि पर्सा राष्ट्रिय निकुञ्जलाई जानकारी गराइएको प्रहरी निरीक्षक बुढाथापाले बताउनुभयो ।