उपनिर्वाचन हुने स्थानमा सुरक्षा व्यवस्था मिलाउन निर्वाचन आयोगको सरकारलाई आग्रह

यहि मंसिर १६ मा हुने स्थानीय तहको उपनिर्वाचनका लागि सम्बन्धीत जिल्ला तथा स्थानमा सुरक्षा व्यवस्था मिलाउन निर्वाचन आयोगले सरकारलाई आग्रह गरेको छ ।

 निर्वाचन आयोगद्वारा गठित उच्च स्तरीय निर्वाचन सुरक्षा समितिको बैठकले उपनिर्वाचनलाई स्वच्छ, स्वतन्त्र, निष्पक्ष, विश्वसनीय र भयरहित बनाउन भन्दै गृहमन्त्रालयलाई सुरक्षा व्यवस्था मिलाउन भनिएको आयोगकी प्रवक्ता नीता पोखरेल अर्यालले जानकारी दिनुभयो । 

उपनिर्वाचन हुने ३३ जिल्लाको ४४ स्थानमा निर्वाचन आचारसंहिता पूर्ण रुपले पालना गराउन तथा पर्सी बुधबार देखि लागू हुनेगरि उपनिर्वाचनको मत गणना नसकिने समय सम्म सम्बन्धीत स्थानमा मदिराजन्य पदार्थको विक्रि वितरण र प्रयोगमा रोक लगाउन समेत आयोगले गृह मन्त्रालय मार्फत् स्थानीय प्रशासनलाई आग्रह गरेको छ ।

भौतिक संरचनाको व्यवस्था गर्नु

निर्वाचन आयोगले उपनिर्वाचन हुने स्थानीय तहमाकायमभएका मतदानस्थल÷केन्द्रमा आधारभूत भौतिक संरचनाको उचित प्रबन्ध मिलाउन सम्बन्धित स्थानीय तहलाई निर्देशन दिएको छ । 

आयोगको आज बसेको बैठकले मतदान स्थलमा खानेपानी, शौचालय, विद्युत्, सञ्चार, आवजावतको वैकल्पिक मार्गका साथै ज्येष्ठ नागरिक, महिला तथा अपाङ्गमैत्री बनाउन निर्देशन दिएको हो । 

संघीय सरकार र प्रदेश सरकारको स्वामित्व वा नियन्त्रणमा रहेको संस्था वा स्थानीय तहका पूर्वाधार तथा भौतिक साधन, सभागृह तथा अतिथि गृह, सवारीसाधन र अन्य विद्युतीय उपकरण मर्मत सम्भार गरी उपनिर्वाचनका लागि आवश्यकताअनुसार प्रयोग गर्न आयोगले आग्रह गरेको छ ।