ममता काफ्लेका श्रीमान भट्टमाथि हत्याको आरोप

अमेरिकाको भर्जिनियामा बेपत्ता भएकी ममता काफ्लेका श्रीमान नरेश भट्टमाथि अभियोजनकर्ताले हत्या आरोपमा मुद्धा चलाउने भएका छन् । प्रिन्स विलियम काउन्टीका अभियोजनकर्ताले भट्टमाथि हत्याको आरोप लगाएका हुन् । 

गत जुलाईदेखि बेपत्ता भएकी नेपाली नर्स काफ्लेको हत्यामा भट्टको नै संलग्नता देखिएको विभिन्न रेकर्डमा देखिएको अन्तर्राष्ट्रिय संचारमाध्यमले देखाएका छन् । मनासस पार्कका प्रहरी प्रमुख मारियो लुगोले पत्रकार सम्मेलनमा उनीहरुको घरमा भेटिएको रगत परिक्षणका क्रममा समेत काफ्लेको डिएनएसँग मेल खाएको र गत जुलाई २९ मा उनको हत्या भएको प्रमाणले देखाएको उल्लेख गरेका छन् । भट्टलाई अदालतमा उपस्थित गराएपछि थप अभियोग लगाउने अदालतको तयारी रहेको अमेरिकी सञ्चारमाध्यमले जनाएका छन् । 

यसअघि काफ्लेको शरीरलाई लुकाउने अपराधको आरोप समेत भट्टमाथि लगाइएको थियो । गत जुलाई २७ मा मनाससको यूभीए हेल्थ प्रिन्स विलियम मेडिकल सेन्टरमा काफ्लेलाई अन्तिम पटक देखिएको थियो । काफ्ले मेडिकल सर्जिकल युनिटमा रेजिष्टर्ड नर्सको रुपमा काम गर्दै आएकी थिइन् ।