बाजुराको रुगीन स्वास्थ्य चौकीमा आगलागी

बाजुराको विकटमा पर्ने हिमाली गाउँपालिका ५ स्थित रुगीन स्वास्थ्य चौकीमा आगलागी भएको छ । आज दिउँसो भएको आगलागीबाट स्वास्थ्य चौकीको १० कोठे भवनसहित सम्पूर्ण स्वास्थ्य उपकरण, औषधी लगायत सामग्रीहरु नष्ट भएको हिमाली गाउँपालिकाका निमित्त प्रमुख प्रशासकीय अधिकृत राजबहादुर भण्डारीले बताउनुभयो ।

स्वास्थ्य चौकीमा रहेको विधुतिय उपकरण चलाउने बेला आगलागी भएको बुुझिएको भण्डारीले बताउनुभयो । उहाँका अनुसार १० वर्षअघि ढुुंगा र काठ प्रयोग गरेर सो स्वास्थ्य चौकी निर्माण गरिएको थियो । निमित्त प्रमुख प्रशासकीय अधिकृत भण्डारीले त्यहाँ बर्थिङ सेन्टर पनि रहेको बताउनुभयो । झण्डै एक करोड मूल्य बरावरको स्वास्थ्य सामग्री जलेर नष्ट भएको उहाँको भनाई छ ।