रास्वपा सभापति लामिछानेविरुद्ध चितवनमा सहकारी ठगीमा मुद्दा दायर

सहकारी ठगीमा आज चितवन जिल्ला अदालतमा राष्ट्रिय स्वतन्त्र पार्टीका केन्द्रीय सभापति तथा पुर्व गृहमन्त्री रवि लामिछाने विरुद्ध मुद्दा दायर भएको छ । चितवन जिल्ला अदालतका सुचना अधिकारी अमृत विश्वकर्माले लामिछानेसहित साहारा चितवन बहुउद्देश्यीय सहकारी संस्था ठगीमा ३२ जना विरुद्ध मुद्दा दायर भएको जानकारी दिनुभयो । 

लामिछानेलाई गोरखा मिडियामा गएको रकम अपचलनमा मुद्दा दायर भएको हो । साहारा चितवनबाट गोरखा मिडिया नेटवर्क प्रालिमा १० करोड ८० लाख १८ हजार १ सय ५१ रुपैया ठगी गरी लगेको अभियोगपत्रमा उल्लेख छ । गीतेन्द्रबाबु (जिबी) राई, छबिलाल जोशी, लक्ष्मीप्रसाद पौडेल, लामिछानेसहित चार जनाबाट सामुहिक दायित्वमा हुन आउने बिगो असुल उपर गराई पाउँ भन्ने माग दावी छ । 

लामिछानेलाई सहकारी ठगीमा मात्रै मुद्दा दायर भएको तर अन्य केहीलाई सहकारी ठगी र संगठित अपराधमा मुद्दा दायर भएको चितवन जिल्ला न्यायाधीवक्ता कार्यालयका प्रमुख रहेका सरकारी वकिल शान्तीप्रसाद लुईटेलले बताउनुभयो । सहकारीबाट गोरखा मिडियामा आएको रकम अरुलाई दिने र लामिछानेले पनि लिएका कारण ठगी पुष्टी भएको अभियोगमा उल्लेख छ ।