बैदेशिक रोजगारीमा जाने कामदारको स्वास्थ्य परीक्षण शुल्कमा बृद्धि

सरकारले बैदेशिक रोजगारमा जाने कामदारको स्वास्थ्य परीक्षण शुल्क बढाएको छ । सरोकारवालासँग छलफल नै नगरी सरकारले एकै चोटी तीन हजार रुपैयाँ बढाएको व्यवसायीको गुनासो छ ।

 यसअघि ६ हजार ५ सय रुपैयाँ तिर्दै आएका कामदारले अब ९ हजार ५ सय रुपैयाँ तिर्नु पर्ने भएको छ । श्रम रोजगार तथा सामाजिक सुरक्षा मन्त्रालयले स्वास्थ्य परीक्षणसम्बन्धी नयाँ कार्यविधि बनाउँदै ३४ प्रकारका परीक्षणका लागि साढे ९ हजार रुपैया शुल्क लाग्ने जनाएको छ । 

श्रमिकको स्वास्थ्य परीक्षण गराउँदै आएका केही व्यवसायीले भने सरकारले आफूहरूसँग कुनै छलफल नै नगरी निर्णय गरेको आरोप लगाएका छन् । मन्त्रालयका प्रवक्ता डण्डुराज घिमिरेले भने यसअघिको भन्दा अन्य परीक्षण पनि बढाएर अनिवार्य रूपमा ३४ प्रकारका स्वास्थ्य परीक्षण गर्नुपरेकाले शुल्क बढाउनु परेको बताउनुभयो ।