विद्यालय शिक्षा विधेयकमाथिको छलफल एक साताका लागि स्थगित

शिक्षा, विज्ञान तथा प्रविधिमन्त्री रघुजी पन्तले समय मागेपछि विद्यालय शिक्षा विधेयकमाथिको छलफल शिक्षा, स्वास्थ्य तथा सूचना प्रविधि समितिले एक साताका लागि स्थगित गरेको छ । उपसमितिले तयार पारेको प्रतिवेदनमाथि छलफलका क्रममा शिक्षामन्त्री पन्तले शिक्षकसँग अनौपचारिक वार्ता भइरहेको बताउनुभएको थियो । शिक्षकसँग वार्ता गरी उनीहरुको मागलाई विधेयकमा समावेश गर्न उहाँले ७ दिनको समय माग गर्नुभएको थियो । 

समितिले सरकारले माग गरेको समय दिने निर्णय गरेको सभापति अम्मरबहादुर थापाले बताउनुभयो । उपसमितिले तयार पारेको प्रतिवेदनप्रति नेपाल शिक्षक महासंघले असन्तुष्टि जनाएपछि मन्त्री पन्त शिक्षकको मागका विषयमा गम्भिर बन्नुभएको हो । विधेयकले विगतमा भएका सहमति सम्बोधन गर्नुपर्ने नेपाल शिक्षक महासंघको माग छ । संविधानको व्यवस्था र राज्यको आर्थिक अवस्था हेरेर शिक्षकका जायज माग पूरा गर्न सकारात्मक रहेको मन्त्री पन्तले बताउँदै आउनुभएको छ ।