एमाले केन्द्रीय कमिटी बैठकमा १ सय ८० जनाले धारणा राखे, बैठक आजै सक्ने तयारी

एमालेको जारी नवौँ केन्द्रीय कमिटी बैठकमा १ सय ८० जना केन्द्रीय सदस्यले आफ्नो धारणा राखेका छन् । केन्द्रीय सदस्यहरूले धारणा राखेपछि आयोगका अध्यक्षहरूले बोल्ने क्रम सुरु भएको छ । आयोगका सदस्य बोलिसकेपछि प्रतिवेदन प्रस्तुत गर्ने नेताहरूले प्रतिवेदन माथि उठेका प्रश्नहरूको जवाफ दिने कार्यक्रम रहेको सचिव पद्मा अर्यालले बताउनुभयो । 

आयोगका अध्यक्षहरूलाई बोल्नको लागि ७ मिनेटको समय दिइएको छ । तीन वटा आयोगका अध्यक्षहरूले आफ्नो धारणा राखेपछि नेताहरूले बैठकमा उठेका प्रश्नको जवाफ दिने कार्यक्रम रहेको उहाँले बताउनुभयो ।

केन्द्रीय कमिटी बैठकमा विधान संशोधनको सवालमा २ सय ६४ वटा सवाल संकलन गरिएको छ । त्यसका आधारमा पार्टीले धारणा बनाउने छ र विधान अधिवेशनमा त्यसलाई प्रस्तुत गरेर छलफल पछि पास गरिने छ ।

हिजो र आजको बैठकमा बोल्ने अधिकांश केन्द्रीय सदस्यहरूले एमालेको ध्यान मिसन २०८४ मा जानु पर्ने बताएका छन् । केपी ओलीको नेतृत्वमा पार्टीलाई अघि बढाउनु पर्ने धारणा उनीहरुको छ ।