प्रतिनिधिसभा सदस्य निर्वाचन २०८२ः ठूला नेतालाई महिलाको चुनौती

आगामी फागुन २१ गते हुने प्रतिनिधिसभाको निर्वाचनमा प्रत्यक्षतर्फ देशभरबाट तीन हजार चार सयभन्दा बढी उम्मेदवार मैदानमा छन् । तीमध्ये ३ सय ८८ जना महिला उम्मेदवार छन् । संख्यात्मक रुपमा महिला उम्मेदवार कम भएपनि कतिपय क्षेत्रमा उनीहरुले प्रमुख दलका प्रभावशाली नेताहरुसँग प्रतिस्पर्धा गर्दैछन् । विभिन्न दलका महिला उम्मेदवारका कारण केही निर्वाचन क्षेत्रमा चुनावी प्रतिस्पर्धा रोचक हुने ठानिएको छ । नेपालका विभिन्न निर्वाचन क्षेत्र मध्येका केहि चर्चामा रहेका निर्वाचन क्षेत्र र उम्मेदवारको विषय यहाँ प्रस्तुत गरिएको छ ।

पूर्वी नेपालको झापाको क्षेत्र नम्बर २ मा रोचक प्रतिस्पर्धा देखिँदैछ । यो क्षेत्रमा पूर्वसभामुख देवराज घिमिरे र पूर्वउपसभामुख इन्दिरा राना प्रतिस्पर्धामा उत्रिएका छन् । पूर्वसभामुख घिमिरे एमालेबाट र पूर्वउपसभामुख इन्दिरा राना रास्वपाबाट उम्मेदवार भएका हुन् । सो सो क्षेत्रमा कांग्रेसबाट सरिता प्रसाईं, नेकपाबाट धर्मशिला चापागाईं, राप्रपाबाट स्वागत नेपाल र स्वतन्त्र उम्मेदवार युवराज संग्रौला लगायतबीच होडबाजी चलेको छ । यस्तै झापा १ मा पनि चुनावी प्रतिस्पर्धा रोचक हुने देखिएको छ । सो क्षेत्रमा राष्ट्रिय स्वतन्त्र पार्टीकी निशा डाँगी उम्मेदवार बनेकी छन् । सो क्षेत्रमा नेपाली कांग्रेसका तर्फबाट केशवराज पाण्डे र एमालेबाट रामचन्द्र उप्रेतीले उम्मेदवारी दिएका छन् । यसअघिको निर्वाचनमा समानुपतिक सूचीबाट संसद् प्रवेश गरेकी डाँगीलाई यसपटक मतदानबाट चुनिएर सो क्षेत्रको प्रतिनिधित्व गर्ने अवसर मिलेको छ ।

पूर्व प्रधानमन्त्री एवम् एमाले अध्यक्ष केपी शर्मा ओली विरुद्ध झापा ५ मा नेपाली कांग्रेसबाट मंधरा चिमरियाको उम्मेदवारी परेको छ । जहाँ रास्वपाका तर्फबाट काठमाडौं महानगरपालिकाका निवर्तमान प्रमुख बालेन्द्र शाह रास्वपाबाट र नेपाली कम्युनिष्ट पार्टीका रञ्जित तामाङ लगायतको उम्मेदवारी परेको छ ।

झापा निर्वाचन क्षेत्र नम्बर ५ मा राप्रपाका अध्यक्ष राजेन्द्र लिङदेन विरुद्ध समेत महिला उम्मेदवार खडा भएका छन् । सो क्षेत्रमा संघीय लोकतान्त्रीक राष्ट्रिय मञ्चबाट चन्द्रकला सावा, जनता समाजवादी पार्टीबाट विनिता कुमारी राजवंशी र नेपाल मजदुर किसान पार्टीबाट धर्म लक्ष्मी दुवालको उम्मेदवारी परेको छ ।

हर्क साम्पाङको उम्मेदवारीले चर्चा पाएको सुनसरी एकमा रास्वपाकी गोमा तामाङले प्रतिस्पर्धा गर्दैछिन् । त्यस्तै, अघिल्लो पटक जितेकी एमालेकी भगवती चौधरी सुनसरी ३ मा कंग्रेसका विजय गच्छदार लगायत उम्मेदवार छन् । यता, सामाजिक, जातीय र राजनीतिक दृष्टिले संवेदनशील मानिएको धनुषा २ मा पनि महिला उम्मेदवार केन्द्रमा छन् । यो क्षेत्रमा नेकपा एमालेकी जुली महतो उम्मेदवार बनेकी छन् । सोही क्षेत्रमा नेपाली कांग्रेसका पूर्व उपसभापति विमलेन्द्र निधि र राष्ट्रिय स्वतन्त्र पार्टीका मनिष झा प्रतिस्पर्धामा छन् ।

सर्लाही क्षेत्र नम्बर ४ मा पनि हेबिवेट नेता विरुद्ध महिला उम्मेदवार खडा भएका छन् । नेपाली कांग्रेसका सभापति गगन थापा र रास्वपाका अमरेश सिंह विरुद्ध सो क्षेत्रमा आम जनता पार्टीबाट रिंकी कुमारी शाहले उम्मेवारी दिएकी छन् । त्यस्तै, सप्तरी ३ मा जनता समाजवादी पार्टी, नेपालका अध्यक्ष उपेन्द्र यादव विरुद्ध ४ जना महिला स्वतन्त्र उम्मेदवारले चुनौती दिएका छन् । महिला उम्मेदवारले चर्चित बनेको अर्को जिल्ला हो चितवन । ३ वटा निर्वाचन क्षेत्र रहेको चितवको क्षेत्र नम्बर २ र ३ सर्वाधिक चर्चामा छ । यसअघि २ पटकसम्म भरतपुर महानगरपालिकाको मेयरका रुपमा काम गरेकी रेणु दाहाल र सोविता गौतमबीच हुने चुनावी प्रतिस्पर्धालाई निकै चासोका साथ हेरिएको छ । दाहाल नेपाली कम्युनिष्ट पार्टीबाट उम्मेदवार बनेकी हुन् भने गौतम राष्ट्रिय स्वतन्त्र पार्टीबाट चुनावी मैदानमा होमिएकी हुन् । सो क्षेत्रमा एमालेका तर्फबाट नेपाली कांग्रेसका टेकप्रसाद गुरुङ र एमालेका तर्फबाट शंकरराज थपलिया चुनावी मैदानमा होमिएका छन् ।