दाङमा भ्यानको ठक्करबाट एक महिलाको मृत्यु

दाङको तुलसीपुरमा भ्यानले स्कूटरलाई ठक्कर दिँदा एक महिलाको मृत्यु भएको छ । एक जना घाइते भएका छन् । 

भ्यानको ठक्करबाट लमही नगरपालिका–५ की ५० वर्षीया लिला भुसालको मृत्यु भएको तुलसीपुरस्थित इलाका प्रहरी कार्यालयका प्रहरी निरीक्षक प्रकाश थापाले बताउनुभयो । 

घोराहीबाट तुलसीपुरतर्फ जाँदै गरेको रा १ च १३०० नम्बरको भ्यानले विपरीत दिशाबाट आउँदै गरेको रा ७ प ११३५ नम्बरको स्कूटरलाई बुधबार तुलसीपुर–७ हात्तीखौवामा ठक्कर दिँदा स्कूटरमा सवार भुसाल घाइते भएकी थिइन् । 

घाइते भुसालको राप्ती प्रादेशिक अस्पतालमा उपचारको क्रममा मृत्यु भएको प्रहरी निरीक्षक थापाले बताउनुभयो । स्कूटर चालक मृतकका छोरा २७ वर्षीय निमलाल भुसालको उपचार भईरहेको छ ।