ब्राउन सुगर सहित दाङबाट दुई जना पक्राउ

लागूऔषध ब्राउनसुगर सहित दाङको घोराहीबाट दुई जना पक्राउ परेका छन् । राप्ती गाउँपालिका–३, मसुरिया घर भई हाल उपमहानगरपालिका–१३, प्रगति टोल बस्ने २२ वर्षीय चिन्तन केसी र घोराही–१३, डुम्मर गाउँका १९ वर्षीय मनोज बुढामगरलाई प्रहरीले पक्राउ गरेको हो । 

घोराही–१३, सुनगाभा टोलमा लागूऔषध कारोबार भईरहेको भन्ने सूचनाका आधारमा पुगेको प्रहरीको टोलीले बिहीबार बेलुका ब्राउनसुगरसहित उनीहरुलाई पक्राउ गरेको हो । 

केसीको साथबाट १ सय ९० मिलिग्राम र बुढा मगरको साथबाट ६ सय ८० मिलिग्राम ब्राउनसुगर बरामद भएको जिल्ला प्रहरी कार्यालयका प्रहरी नायब उपरीक्षक चक्रबहादुर शाहले बताउनुभयो । दुवै जनालाई थुनामा राखेर थप अनुसन्धान गरिरहेको प्रहरीले जनाएको छ ।