ताप्लेजुङ गोल्डकपको खेल तालिका सार्वजनिक

आगामी भदौ ३ देखि १० गतेसम्म आयोजना हुने ताप्लेजुङ गोल्डकप फुटबल प्रतियोगिताको खेल तालिका सार्वजनिक भएको छ । 

उद्धघाटन खेलमा आयोजक संघर्ष स्पोर्टिङ युवा क्लव र पाहुना टोली भारत सिक्किमको कञ्चनजंघा फुटबल क्लवबीच प्रतिस्पर्धा हुनेछ । खेल सदरमुकाम फुङलिङस्थित भानुजन माध्यमिक विद्यालयको खेल मैदानमा दिउँसो साढे २ बजे सुरु हुनेछ । 

प्रतियोगितामा सहभागी ८ टोलीलाई दुई समूहमा विभाजन गरिएको छ । समूह ए मा आयोजकसँगै भारत सिलिगुढीको कञ्चनजंघा फुटबल क्लब, रुपन्देहीको बुटबल लुम्बिनी फुटबल क्लब र मोरङको सगरमाथा युथ क्लब रहेका छन् । 

यस्तै समूह बी मा पाँचथरको पाँचथर फुटबल क्लब, सिरहाको सलहेश युवा क्लब, त्रिभुवन आर्मी फुटबल क्लब र झापाको बिर्तामोड युनाइटेड फुटबल क्लब छन् । प्रतियोगिताको विजेताले ५ लाख, उपविजेताले २ लाख ५१ हजार रुपैयाँ प्राप्त गर्ने आयोजक लाखे जात्रा खेल सञ्चालक समितिका अध्यक्ष देवराज गुरुङले बताउनुभयो ।