एन्फा महिला लिगमा विभागीय आर्मी र एपीएफ क्लब भिड्दै

एन्फा महिला लिग फुटबलमा विभागीय डर्बी त्रिभुवन आर्मी र एपीएफ क्लबबीच प्रतिस्पर्धा हुँदैछ । ललितपुरको सातदोबाटोस्थित एन्फा कम्प्लेक्सको मैदानमा हुने आर्मी र एपीएफ बीचको खेल मध्याह्न साढे १२ बजे सुरु हुनेछ । 

लिगमा अपराजित एपीएफको मनोबल उच्च छ । आजको खेलमा आर्मीलाई स्तब्ध पार्दै एपीएफ लिगको शीर्ष स्थानमा उक्लिने योजनामा छ । यसअघिका चार मध्ये तीनमा जित र एक खेल बराबरी खेलेको एपीएफ १० अंकसहित तालिकाको दोस्रो स्थानमा छ । 

आर्मी पनि एपीएफको चुनौती पन्छाउँदै अंक तालिकामा सुधार गर्ने योजनामा छ । लिगका चार मध्ये तीनमा जित र एकमा हार बेहोरोको आर्मी ९ अंकका साथ तालिकाको तेस्रो स्थानमा रहेको छ ।

यस्तै, लिग अन्तर्गत आजै हुने दोस्रो खेलमा संकटा क्लबले कोशी प्रदेशको सामना गर्नेछ । कम्प्लेक्सको मैदानमा हुने संकटा र कोशीबीचको खेल दिउँसो साढे ३ बजे सुरु हुनेछ । कोशी ९ अंकसहित तालिकाको चौंथो स्थानमा छ भने संकटा चार अंक सहित सातौं स्थानमा छ ।