एन्फा महिला लिगः एपीएफ शीर्ष स्थानमा, चन्द्रपुर त्रिभुवन आर्मीसँग १०–० ले पराजित

रश्मिकुमारी घिसिङले ह्याट्रिकसहित पाँच गोल गरेसँगै एन्फा महिला लिग फुटबलमा विभागीय टोली नेपाल एपीएफ क्लबले अपराजित यात्रालाई कायमै राखेको छ ।

आज भएको खेलमा कोशी प्रदेशलाई ८–० को फराकिलो गोलअन्तरले हराउँदै एपीएफले छैटौं जित निकालेको हो ।

ललितपुरको सातदोबाटोस्थित एन्फा कम्प्लेक्सको मैदानमा एपीएफको जितमा रश्मिकुमारी घिसिङले ५ गोल गर्दा कप्तान अनिता बस्नेतले २ तथा अनिता केसी १ गोल गरिन् ।

जितसँगै एपीएफ १९ अंकसहित तालिकाको शीर्ष स्थानमा यथावत छ । कोशी १० अंकसहित तालिकाको पाँचौ स्थानमा छ ।

चन्द्रपुर त्रिभुवन आर्मीसँग १०–० ले पराजित

आजै भएको दोस्रो खेलमा विभागीय टोली त्रिभुवन आर्मी क्लबले चन्द्रपुर नगरपालिकालाई १०–० को फराकिलो गोलअन्तरले हरायो ।

आर्मीको जितमा चन्द्र भण्डारी र अमिशा कार्कीले ह्याट्रिक गर्दा, हिमा चौधरी, दिपा शाही, अन्जना राना मगर र सर्मिला थापाले एक÷एक गोल गरिन् ।

जितसँगै, आर्मी १६ अंकसहित दोस्रो स्थानमा यथावत छ । चन्द्रपुर ७ अंकसहित तालिकाको छैटौं स्थानमा छ । लिग अन्तर्गत भोली हुने खेलमा संकटा फुटबल क्लब र सुदूरपश्चिम प्रदेश तथा विभागीय टोली नेपाल पुलिस क्लब र स्याङ्जाको वालिङ नगरपालिकाबीच प्रतिस्पर्धा हुनेछ ।