चेल्सीले म्यानचेस्टर युनाइटेडलाई बराबरीमा रोक्यो

इंग्लिस प्रिमियर लिग फुटबलमा चेल्सीले म्यानचेस्टर युनाइटेडलाई बराबरीमा रोकेको छ । म्यानचेस्टर युनाइटेडले घरेलु मैदान ओल्ड ट्राफोर्डमा गएराति भएको खेलमा चेल्सीसँग १–१ गोलको बराबरी खेलेको हो । 

पहिलो हाफ गोलरहित बराबरीमा सकिएको थियो । दोस्रो हाफमा म्यान युनाइटेडले अग्रता लिएपनि त्यसलाई जोगाउन सकेन । चेल्सीका गोलकिपर रोबर्ट सान्चेजले, रास्मस होइलुन्डलाई फाउल गरेपछि म्यान युनाइटेडले पेनाल्टीको अवसर पाएको थियो । खेलको ७० औं मिनेटमा ब्रुनो फर्नान्डेसले पेनाल्टीमा गोल गर्दै म्यान युनाइटेडलाई अग्रता दिलाए ।

त्यसको चार मिनेटपछि चेल्सीले बराबरी गोल फर्कायो । चेल्सीका लागि मोइसेस काइसेडोले खेलको ७४ औं मिनेटमा गोल गरेका थिए । यो बराबरीसँग चेल्सी १० खेलबाट १८ अंकका साथ तालिकाको चौंथो स्थानमा उक्लेको छ । यो सिजन खराब अवस्थाबाट गुज्रिरहेको म्यान युनाइटेड भने समान १० खेलबाट १२ अंकसहित तालिकाको १३ औं स्थानमा रहेको छ ।

यस्तै, प्रिमियर लिगको अर्को खेलमा टोटनहमले उत्कृष्ट पुनरागमन गर्दै एस्टन भिल्लालाई पराजित गरेको छ । टोटनहम हटस्पर स्टेडियममा आइतबार भएको खेलमा घरेलु टोली टोटनहमले एस्टन भिल्लालाई ४–१ गोलले हराएको हो । 

खेलको ३२ औं मिनेटमा मोर्गन रोजर्सको गोल मार्फत भिल्लाले अग्रता लिएको थियो । त्यसपछि टोटनहमले चार गोल फर्कायो । टोटनहमका लागि डोमिनिक सोलन्केले खेलको ७५ औं र ७९ औं मिनेटमा दुई गोल गरे । ब्रेनन जोनसन र जेम्स म्याडिसनको नाममा एक/एक गोल रह्यो ।