यु–१९ महिला टी–२० विश्वकप एसिया छनोटमा नेपालको दोस्रो जित

यूएईमा जारी आइसिसी यु–१९ महिला टी–२० विश्वकप एसिया छनोटमा नेपालले लगातार दोस्रो जित निकालेको छ । 

यूएईको अजमानस्थित द सेभेन क्रिकेट रंगशालामा भएको खेलमा नेपालले कुवेतमाथि १ सय ८ रनको अन्तरको फराकिलो जित हात पारेको हो । टस जितेर ब्याटिङ गदै नेपालले दिएको १ सय ३१ रनको लक्ष्य पछ्याउने क्रममा कुवेत १३ ओभरमा अलआउट हुँदै २२ रनमा समेटिएको थियो ।

 त्यसअघि नेपालले निर्धारित २० ओभरमा आठ विकेट गुमाउँदै एक सय ३० रन बनाएको थियोे । नेपालका लागि कप्तान पूजा महतोले सर्वाधिक ३४ रन बनाइन् । 

यस्तै साना प्रवीणले २५ रन बनाइन् । यसअघि हिजो भएको खेलमा नेपाल थाइल्याण्डविरुद्ध ६७ रनले विजयी भएको थियो । एसिया छनोटमा नेपालसहित आयोजक यूएई, कुवेत र थाइल्याण्ड छन् ।