भिनिसियस जुनियरको ह्याट्रिकमा रियल म्याड्रिड विजयी

भिनिसियस जुनियरको ह्याट्रिकमा रियल म्याड्रिडले स्पेनी ला लिगा फुटबलमा ओसासुनाविरुद्ध सानदार जित निकालेको छ । 

घरेलु मैदान सान्टियागो बर्नाबाउमा भएको पछिल्लो खेलमा रियलले पाहुना टोली ओसासुनालाई ४–० गोल अन्तरले पराजित गरेको हो । 

यो जितसँगै रियलले लगातार दुई हारको क्रमलाई पनि टुंग्याएको छ । रियलको जितमा भिनिसियस जुनियरले खेलको ४२, ६१ र ६९ औं मिनेटमा गोल गरेका थिए । जुड बेलिङघमको नाममा एक गोल रह्यो ।

यो नतिजापछि रियल २७ अंकका साथ तालिकाको दोस्रो स्थानमा छ । शीर्ष स्थानको बार्सिलोनाले १२ खेलबाट ३३ अंक जोडेको छ । भिल्लारियल भने २४ अंकसहित तेस्रो स्थानमा उक्लेको छ । 

लयमा रहेको भिल्लारियलले अर्को खेलमा डेर्पोटिभो एलाभेसलाई ३–० गोलले हराएको थियो । यस्तै, लेगानेसले सेभियालाई १–० गोलले पराजित गरेको छ ।