च्याम्पियन्स लिगमा आर्सनलको सानदार जित

आर्सनलले च्याम्पियन्स लिग फुटबलमा स्पोर्टिङ सीपीमाथि सानदार जित निकालेको छ । एस्टेडियो जोस अलभालाडेमा गएराति भएको खेलमा आर्सनलले घरेलु टोली स्पोर्टिङ सीपीलाई ५–१ गोलको फराकिलो अन्तरले पराजित गरेको हो । 

आर्सनलले खेलको सातौं मिनेटमा ग्याब्रियल मार्टिनेलीको गोलबाट अग्रता लिएको थियो । त्यसपछि काई हाभर्ट्ज, गेब्रियल, बुकायो साका र लिआन्ड्रो ट्रोसार्डले आर्सनलका लागि गोल गरे । 

स्पोर्टिङ सीपीका लागि खेलको ४७ औं मिनेटमा गोन्कालो इनासियोले सान्त्वना गोल फर्काए । यो नतिजासँगै आर्सनल ५ खेलबाट १० अंकका साथ तालिकाको सातौ स्थानमा रहेको छ । समान ५ खेल खेलेको स्पोर्टिङ सीपी पनि १० अंकका साथ आठौं स्थानमा रह्यो ।

यसैबीच, म्यानचेस्टर सिटी च्याम्पियन्स लिगमा फायनउडसँग बराबरीमा रोकिएको छ । घरेलु मैदान इतिहाद स्टेडियममा गएराति भएको खेलमा म्यान सिटीले तीन गोलको अग्रता गुमाउँदै पाहुना टोली फायनउडसँग निराशाजनक बराबरीमा चित्त बुझाएको हो । 

इर्लिङ हालान्डको दुई गोलमा सिटी ५० औं मिनेटसम्म ३–० ले अगाडि थियो । त्यसपछि फायनउडले तीन गोल फर्काएको हो । यो बराबरीसँगै सिटी ५ खेलबाट ८ अंक जोडेर तालिकाको १५ औं स्थानमा रह्यो ।