लिभरपुलसँग टोटनहम स्तब्ध, शीर्ष स्थानमा ४ अंकको अग्रता

लिभरपुलले इंग्लिस प्रिमियर लिग फुटबलको शीर्ष स्थानमा चार अंकको अग्रता लिएको छ । टोटेनहाम हटस्पर स्टेडियममा भएको पछिल्लो खेलमा लिग लिडर लिभरपुलले घरेलु टोली टोटेनहामलाई ६–३ गोलले पराजित गर्दै तालिकामा चार अंकको अग्रता बनाएको हो । 

लिभरपुलको जितमा लुइस डियाज र मोहम्मद सलाहले समान २-२ गोल गरे । डोमिनिक सोबोस्लाइ र एलेक्सिस म्याक एलिस्टरको नाममा एक–एक गोल रह्यो । 

टोटनहमका लागि जेम्स म्याडिसन, डेजान कुलेसेभ्स्की र डोमिनिक सोलान्केले एक–एक गोल फर्काए । यो नतिजासँगै लिभरपुलको १६ खेलबाट ३९ अंक भएको छ । दोस्रो स्थानको चेल्सीको १७ खेलबाट ३५ अंक छ । 

पराजित टोटनहम भने १७ खेलमा २३ अंक जोडेर तालिकाको ११ औं स्थानमा रहेको छ । गएराति भएको खेलमा चेल्सीले एभर्टनसँग निराशाजनक प्रदर्शन गर्दै गोल रहित बराबरी खेलेको थियो । अन्य खेलमा बर्नमाउथले म्यानचेस्टर युनाइटेड तथा उल्भ्सले लेस्टर सिटीलाई समान ३–० ले हरायो ।