बुटवलमा १० औं जिल्लास्तरीय अन्तर मावि भलिबल प्रतियोगिता सुरु

रुपन्देहीको बुटवलमा १० औं जिल्लास्तरीय अन्तर मावि एभरेष्ट कप छात्रा भलिबल प्रतियोगिता सुरु भएको छ । एभरेष्ट इंग्लिस माविको आयोजनामा मंगलबारदेखि सुरु भएको प्रतियोगितामा कुँवरवर्ति इंग्लिस बोर्डिङ स्कूलले विजयी सुरुवात गरेको छ । 

उद्घाटन खेलमा कुँवरवर्तिले जनज्योती माविलाई २–० को सोझो सेटमा हरायो । त्यस्तै दोस्रो खेलमा देवदह माध्यमिक विद्यालयले होराइजन स्कूल लाई २–१ को सेटमा पराजित गर्न सफल भयो । 

मंगलबार नै भएको तेस्रो खेलमा देवदह बुद्ध पब्लिकले मणिमुकुन्द स्कूललाई सोझो सेटमा पराजित ग¥यो । चौथो खेलमा मदरटङ्गस स्कूलले ग्रिन प्लान्ट स्कूललाई सोझो सेटमा पराजित गरेर अघिल्लो चरणमा प्रवेश गरेको आयोजक विद्यालयका सहप्राचार्य भिमसेन गौतमले जानकारी दिनुभयो ।

यसअघि प्रतियोगिताको उद्घाटन गर्दै बुटवल उपमहानगरपालिकाका नगरप्रमुख खेलराज पाण्डेयले नगरका नीजि विद्यालय खेलकुद गतिविधिमा अग्रसर रहेर खेलाडी उत्पादनमा महत्वपूर्ण योगदान दिएको बताउनुभयो । 

३ दिनसम्म चल्ने प्रतियोगिताको उपाधि विजेताले नगद ३० हजार रुपैयाँ, कप, मेडल, प्रमाणपत्र प्राप्त गर्नेछन् । 

यस्तै उपविजेता टिमलाई नगद २० हजार, तृतीय टिमले नगद १० हजार रुपैयाँ, कप, मेडल, प्रमाणपत्र प्राप्त गर्ने खेल संयोजक अर्जुन घिमिरेले जानकारी दिनुभयो । प्रतियोगितामा रुपन्देहीका १६ टिमले प्रतिस्पर्धा गर्दैछन् । अघिल्लो संस्करणमा आयोजक एभरेष्ट उपाधि विजेता बनेको थियो ।