आर्मीलाई पराजित गर्दै पुलिसको महिला टोली इलिमिनेटरमा

टाइगर कप राष्ट्रिय तथा अन्तर्राष्ट्रिय क्लब भलिबल प्रतियोगिताको महिलातर्फ नेपाल पुलिस क्लब इलिमिनेटर राउण्डमा प्रवेश गरेको छ । 

पोखरा रंगशालास्थित भलिबल कोर्टमा मंगलबार बिहान भएको खेलमा त्रिभुवन आर्मी क्लबलाई ३–० को सोझो सेटमा पराजित गर्दै नेपाल पुलिस क्लब इलिमिनेटरमा प्रवेश गरेको हो । पुलिसले पहिलो सेट २५–१८, दोस्रो सेट २५–२१ र तेस्रो सेट २५–१९ ले आफ्नो पक्षमा पार्‍यो ।

दोस्रो सेटमा १६–१० को आर्मीको अग्रतालाई उल्टाउँदै पुलिसले जित निकालेको थियो । अन्य सेटमा भने पुलिसले सहज जित निकाल्यो । पहिलो चरणमा पराजित समूहबाट ६ अंक जोडेर शीर्ष स्थानमा रहँदै पुलिस इलिमिनेटरमा प्रवेश गरेको हो । 

पुलिसले यसअघि थाइल्यान्डको ट्राभल इन्क्व्यारी युनाइटेड प्यासन भलिबल क्लबलाई ३–१ को सेटमा हराएको थियो । आर्मी र ट्राभल इन्क्व्यारी एक खेल अगावै प्रतियोगिताबाट बाहिरिएका छन् । पुलिसले अब विजेता समूहबाट तेस्रो स्थानमा रहने टोलीसँग इलिमिनेटर खेल्नेछ । विजेता समूहमा आयोजक टाइगर ग्रुप, एपीएफ र टिपटप न्यु डायमन्ड स्पोट्र्स क्लब छन् ।

यसैबीच, दोस्रो खेलमा अहिले महिलातर्फ टिपटप न्यू डायमन्ड स्पोट्र्स क्लब र आयोजक टाइगर ग्रुपबीच प्रतिस्पर्धा भइरहेको छ । आजै पुरुषतर्फको पहिलो खेलमा गण्डकी प्रदेश र एपीएफ क्लबबीच तथा दोस्रो खेलमा नेपाल पुलिस क्लब र त्रिभुवन आर्मी क्लबबीच प्रतिस्पर्धा हुनेछ ।