पुलिस टाइगर कप भलिबलको इलिमिनेटर राउण्डमा प्रवेश

टाइगर कप राष्ट्रिय तथा अन्तर्राष्ट्रिय क्लब भलिबल प्रतियोगिताको महिलातर्फ नेपाल पुलिस क्लब इलिमिनेटर राउण्डमा प्रवेश गरेको छ ।

पोखरा रंगशालास्थित भलिबल कोर्टमा बिहान भएको खेलमा त्रिभुवन आर्मी क्लबलाई ३–० को सोझो सेटमा पराजित गर्दै पुलिस इलिमिनेटरमा प्रवेश गरेको हो । पुलिसले २५–१८, २५–२१ र २५–१९ ले सेट आफ्नो पक्षमा पार्यो । 

पहिलो चरणमा पराजित समूहबाट ६ अंक जोडेर शीर्ष स्थानमा रहँदै पुलिस इलिमिनेटरमा प्रवेश गरेको हो । पुलिसले यसअघि थाइल्यान्डको ट्राभल इन्क्व्यारी युनाइटेड प्यासन भलिबल क्लबलाई ३–१ को सेटमा हराएको थियो । 

यो हारसँगै आर्मी र थाइल्यान्डको टोली एक खेल अगावै प्रतियोगिताबाट बाहिरिएका छन् । यस्तै, आजै भएको दोस्रो खेलमा आयोजक टाइगर ग्रुपले न्यू डायमन्ड स्पोट्र्स क्लबलाई ३–० को सोझो सेटमा पराजित गरेको छ । 

टाइगर ग्रुपले न्यू डायमन्डलाई २७–२५, २५–२१ र २५–२१ ले हराएको हो । न्यू डायमन्डले अब इलिमिनेटरमा नेपाल पुलिस क्लबसँग प्रतिस्पधा गर्नेछ ।

पुरुषतर्फ आज भएका खेलमा गण्डकी प्रदेश र त्रिभुवन आर्मी क्लब विजयी भएका छन् । 

पहिलो खेलमा गण्डकीले एपीएफ क्लबलाई ३–१ को सेटमा हरायो । पहिलो सेट २५–२३ ले हारेको गण्डकीले पुनरागमन जित दर्ता गर्यो । गण्डकीले दोस्रो सेट २५–२०, तेस्रो सेट २५–१९ र चौंथो सेट २५–१५ ले आफ्नो पक्षमा पार्यो । 

अर्को खेलमा त्रिभुवन आर्मीले नेपाल पुलिस क्लबलाई ३–१ को सेटले पराजित गर्यो । 

पहिलो सेटमा २५–१३ ले आफ्नो पक्षमा पारेको आर्मीले दोस्रो सेट २१–२५ ले पुलिसलाई सुम्पिएको थियो । तेस्रो सेट र चौथो सेटमा पुनरागमन गर्दै आर्मीले खेल आफ्नो पक्षमा पार्यो। 

आर्मीले तेस्रो सेट २५–१५ र चौथो सेट २५–२२ ले जित्न सफल भयो ।