महिला टी-२० त्रिकोणात्मक क्रिकेट शृंखला आजदेखि

महिला टी–२० अन्तर्राष्ट्रिय त्रिकोणात्मक क्रिकेट शृंखला आजदेखि काठमाडौंमा सुरु हुँदैछ । नेपालले कीर्तिपुरस्थित त्रिवि क्रिकेट मैदानमा नेदरल्यान्ड्स र थाइल्यान्ड सम्मिलित टी–२० क्रिकेट श्रृंखला खेल्न लागेको हो । 

नेपालले त्रिकोणात्मक क्रिकेट शृंखलाको उद्घाटन खेलमा नेदरल्यान्ड्सको सामना गर्नेछ । यी दुई टोलीबीचको खेल दिउँसो सवा १२ बजे सुरु हुनेछ । महिला टी–२० शृंखला नेपालले खेल्न लागेको ठूलो प्रतियोगिता मध्येमा पर्छ । 

गत जुलाईमा श्रीलंकामा सम्पन्न महिला एसिया कप नेपालले खेलेको सबैभन्दा ठूलो प्रतियोगिता हो । यो शृंखलामा तीन राउन्ड रोबिनमा प्रतिस्पर्धा हुनेछ । सर्वाधिक अंक बटुल्ने टोली प्रतियोगिताको विजेता बन्नेछ । 

हिजो आयोजित पत्रकार सम्मेलनमा नेपाल क्रिकेट संघ क्यानका क्रिकेट म्यानेजर विनोद दासले सबै टोलीले समान अवसर पाओस् भनेर फाइनल नराखिएको बताउनु भएको थियो ।

महिला टी–२० अन्तर्राष्ट्रिय प्रतियोगिताको वरीयतामा थाइल्यान्ड १३ औं, नेदरल्यान्ड्स १६ औं र नेपाल २० औं स्थानमा रहेको छ । एसियाली क्षेत्रमा भएका कारण नेपालले थाइल्यान्डसँग एसियाली क्रिकेट परिषद्को प्रतियोगितामा नियमित खेल्दै आएपनि नेदरल्यान्ड्ससँग पहिलो पटक खेल्न लागेको हो । 

थाइल्याण्ड पनि नेपालमा आएर पहिलो पटक खेल्दै छ । यस शृंखलाका लागि क्यानले यसअघि नै इन्दु बर्माको कप्तानीमा १५ सदस्यीय टोलीको घोषणा गरिसकेको छ । 

क्यानले प्रतियोगितामा समर्थकले निःशुल्क मैदान भित्रबाट खेल हेर्न मिल्ने घोषणा गरिसकेको छ । महिला क्रिकेटलाई थप प्रवर्धन गर्नका लागि निःशुल्क मैदानभित्रबाट खेल हेर्ने व्यवस्था मिलाइएको क्यानले जनाएको छ ।