आहा–रारा गोल्डकपः संकटालाई हराउँदै थन्डरबोल्ट नर्थ युनाइटेड क्वाटरफाइनलमा प्रवेश

दुई पटकको विजेता संकटा क्लवलाई हराउँदै सिक्किमको थन्डरबोल्ट नर्थ युनाइटेड पोखरामा जारी २४ औं आहा रारा गोल्डकप फुटबल प्रतियोगिताको क्वाटरफाइनलमा प्रवेश गरेको छ । 

संकटा क्लबलाई आज ३–१ ले पराजित गर्दै थन्डरबोल्ट अन्तिम आठमा पुगेको हो । शुरुवाती अग्रता जोगाउन नसक्दा संकटा पहिलो खेलबाटै बाहिरियो । मनिष पौडेलको गोलमा संकटाले खेलको १६ औं मिनेटमा अग्रता लिएको थियो ।

 थन्डरबोल्टले ३४ औं, ७७ औं र खेल सकिनु एक मिनेट अघि गोल गर्दै जित हात पारेको हो । थन्डरबोल्टले क्वाटरफाइनलमा उज्वेकिस्तानको ब्ल्याक बुल्स एफसीको सामना गर्नेछ । उज्वेकिस्तानको टोलीले सोझै क्वाटरफाइनल खेल्न लागेको हो । प्रतियोगिताको पहिलो क्वाटरफाइनलमा भोलि नेपाल पुलिस क्लब र बेलायतको ब्रिगेड ब्वाइज क्लबबीच प्रतिस्पर्धा हुनेछ ।